Дзяржарганізацыям забаранілі купляць аўто даражэй € 25000

• 12.03.2013, 17:54

Лукашэнка падпісаў указ аб упарадкаванні набыцця службовых легкавых аўтамабіляў.

Згодна з дакументам, дзяржаўныя арганізацыі могуць набываць легкавыя аўтамабілі кошт якіх не перавышае 25 тысяч еўра.

«Кошт службовага легкавога аўтамабіля, набытага дзяржорганамі, дзяржаўнымі юрыдычнымі асобамі, гаспадарчымі таварыствамі, у статутных фондах якіх больш за 50% акцый знаходзіцца ва ўласнасці дзяржавы, а таксама сельгасарганізацыямі з доляй дзяржавы ў статутным фондзе, не павінна перавышаць суму, эквівалентную 25 тысяч еўра з улікам мытных плацяжоў», - гаворыцца ў паведамленні прэс-службы кіраўніка.

Нагадаем, у незалежных СМІ неаднаразова з'яўлялася інфармацыя аб жаданні чыноўнікаў набыць дарагія іншамаркі за кошт бюджэту. Падобныя заяўкі размяшчаліся на афіцыйных сайтах дзяржзакупак. Напрыклад, толькі ўчора стала вядома пра тое, што віцебскія чыноўнікі хочуць купіць таніраваны мікрааўтобус за 85 тысяч даляраў.