Палецкіс апраўдваецца

• 20.03.2013, 22:08

Еўрадэпутат адказаў на крытыку лідара «Еўрапейскай Беларусі» Андрэя Саннікава.

Дакладчык дэлегацыі Еўрапейскага парламента ў справах Беларусі Юостас Палецкіс заявіў, што для наладжвання стасункаў з Еўрапейскім Звязам афіцыйны Менск павінен вызваліць палітвязняў, паведамляе БелаПАН.

«Вызваленне палітвязняў - гэта праграма-мінімум. Але адначасова гэта і зняццё велізарнага бар'ера, магчымасць для дыялогу, падчас якога могуць адбыцца нядрэнныя змены», - сказаў еўрадэпутат.

Таксама Юостас Палецкіс заявіў, што яму нічога невядома аб планах абмяняць магчымасць вяртання ў Менск шведскага амбасадара на выключэнне міністра замежных спраў Беларусі са спісу беларускіх чыноўнікаў, неўязных у ЕЗ.

«Наколькі мне вядома, такога абмену не было. І я не думаю, што ён можа быць. Хоць, прызнаюся, мне далёка не ўсё вядома пра перамовы ЕЗ з Менскам. Але наогул прымітыўныя абмены - гэта не стыль Еўразвязу. Стыль Еўразвязу, на мой погляд - ствараць умовы, каб, калі няма кардынальных перашкод, усё ж рухацца наперад і думаць аб тым, што было б лепш грамадзянам Беларусі і грамадзянам Еўразвязу», - сказаў ён.

Нагадаем, сёння лідар «Еўрапейскай Беларусі» Андрэй Саннікаў раскрытыкаваў заяву Юостаса Палецкіса пра тое, што Менск нібыта гатовы вызваліць палітвязняў.

«Гэта спроба супакоіць грамадскую думку, перш за ўсё ў Еўропе. Незразумела, чаму Палецкіс удзельнічае ў гэтай бруднай гульні», - сказаў былы кандыдат у прэзідэнты Беларусі.

Фотa: delfi.ee