Пракаповіч папрасіў банкі раскашэліцца

• 29.03.2013, 16:15

Банкаўскі сектар павінен прыняць актыўны ўдзел у «мадэрнізацыі» прадпрыемства, кліента, які ўваходзіць у склад банка.

Пра гэта заявіў сёння на агульным сходзе акцыянераў БПС-Ашчадбанка віцэ-прэм'ер Пётр Пракаповіч, паведамляе БелТА.

«Галоўная задача для банка - актыўны ўдзел у мадэрнізацыі беларускай эканомікі, гэта значыць актыўны ўдзел у «мадэрнізацыі» кожнага прадпрыемства, кліента, які ўваходзіць у склад банка», - сказаў Пракаповіч.

Асабліва важна, каб добрае развіццё атрымалі малыя і сярэднія прадпрыемствы, працягнуў ён. «Задача стаіць вельмі складаная ў гэтым кірунку. За тры гады мы павінны фактычна падвоіць эканамічны патэнцыял малых і сярэдніх прадпрыемстваў. Зрабіць гэта без удзелу банкаў немагчыма», - падкрэсліў Пётр Пракаповіч.

Таму кожны банк павінен актыўна ўдзельнічаць у гэтай працы: аказваць падтрымку малым і сярэднім прадпрыемствам, у тым ліку гэта тычыцца распрацоўкі бізнес-планаў, вылучэння крэдытных рэсурсаў. «І пажадана, каб гэтыя крэдытныя рэсурсы былі даступнымі», - падкрэсліў віцэ-прэм'ер.

Нагадаем, Пётр Пракаповіч быў прызначаны прадстаўніком дзяржавы ў ААТ «БПС-Ашчадбанк» 6 лютага.

Фота: photo.bymedia.net