Справа Гайдукова развальваецца

• 5.03.2013, 18:33

Следства па справе наваполацкага актывіста працягнулі да 8 сакавіка.

Пра гэта charter97.org паведаміла Вольга Гайдукова, маці палітвязня Андрэя Гайдукова.

«Сёння з Андрэем сустрэўся адвакат, але нічога новага не распавёў, так як даў падпіску пра неразгалошванне. Вядома толькі тое, што следства працягнулі да 8 сакавіка. Спадзяюся, што неўзабаве нам стануць вядомыя падрабязнасці па гэтай справе, а пакуль што ўсё пакрыта завесай таямніцы. Я ўпэўненая, што абвінавачванне ў шпіянажы абсалютна абсурднае», - адзначыла маці палітычнага вязня.

Жанчына таксама падкрэсліла, што расследаванне ідзе ўжо пяты месяц, і за гэты час ёй ні разу не дазволілі сустрэцца з сынам.

«Я неаднаразова хадайнічала аб спатканні, але мне кожны раз адмаўлялі. Сябар майго сына, Яўген Канстанцінаў, які праходзіць у якасці сведкі па гэтай справе, таксама настойваў на сустрэчы з Андрэем, але і яму ў гэтым было адмоўлена. Добра, што даходзяць лісты і пасылкі, хоць першыя тры тыдні пасля арышту стаяла мёртвая цішыня», - склала Вольга Гайдукова.

Нагадаем, Андрэя Гайдукова затрымалі ў Віцебску 8 лістапада. 23-гадовага апаратчыка наваполацкага прадпрыемства «Нафтан» вінавацяць у «здрадзе дзяржаве ў форме агентурнай дзейнасці». Паводле афіцыйнай інфармацыі, хлопца затрымалі «падчас закладкі схованкі са звесткамі, якія цікавяць замежныя спецслужбы».

Гэта абвінавачванне многія лічаць бессэнсоўным. Грамадзянская кампанія «Еўрапейская Беларусь» выступіла з заявай, у якой паведамлялася пра тое, што актывіста затрымалі за распаўсюджванне газеты «Хартыя'97». Праваабаронцы пераслед Гайдукова звязваюць з яго апазіцыйнымі поглядамі і тлумачаць спробамі запалохаць моладзевых актывістаў.