Чатырохдзёнка на «Гарызонце» і МАЗе: як жыць на 2/3 зарплаты?
- 19.04.2013, 10:31
Рабочыя думаюць, як выжыць на жабрацкую зарплату.
«Менскі завод «Гарызонт» працуе з перабоямі. Звольненыя больш за 100 чалавек», - такое паведамленне нядаўна з'явілася ў СМІ.
Па словах аднаго з рабочых прадпрыемства, праблемы на заводзе пачаліся некалькі месяцаў таму. А ў пачатку сакавіка ў некаторых цэхах быў уведзены чатырохдзённы працоўны тыдзень. У прыватнасці, гэта кранула цэх па зборцы тэлевізараў, піша сайт prof-press.by.
У красавіку сітуацыя пагоршылася: цэх і зусім спыніўся на некалькі дзён: «Заднім чыслом быў падпісаны загад аб тым, што да 15-га чысла цэх не працуе, а нам будуць выплачваць 2/3 зарплаты. Пры гэтым большасць работнікаў атрымлівае крыху больш за 2 млн рублёў. Як выжыць на такую суму - незразумела. Раней наш цэх працаваў у дзве змены. Зараз тэлевізары ўласнай вытворчасці практычна не прадаюцца. Мы збіраем мадэлі замежных фірмаў», - наракае рабочы завода.
Ды і колькасць супрацоўнікаў у параўнанні з восенню скарацілася. Кантракты не працягнулі некалькім дзесяткам чалавек. «Сітуацыя складаная, але пакуль не выклікае сур'ёзнай трывогі. Завод электронікі і бытавой тэхнікі ў такім рэжыме, на жаль, працуе другі год. Заказчык не жадае затаваранасці, прадукцыя павінна сыходзіць прама на продаж, а пакуль попыту няма. Тэлевізары сёння - сезонны тавар і купляюцца ў другім паўгоддзі. Асноўныя работы пачнуцца з другой паловы траўня», - распавядае старшыня прафкама адзінай прафсаюзнай арганізацыі холдынгу «Гарызонт» Валянціна Сідаркевіч.
Яшчэ ў лютым дырэктар холдынгу Юрый Прадко папярэджваў, што ў пачатку года сітуацыя будзе няпростая: маўляў, трэба пацярпець, затое потым загрузка будзе такая, што, магчыма, прыйдзецца набіраць работнікаў. Увосень мінулага года, напрыклад, нагрузка аказалася такой сур'ёзнай, што людзі працавалі нават у суботу і нядзелю, было шмат жадаючых атрымаць вялікія грошы. Тады зарплата дасягала ў асобных выпадках 8-10 млн. рублёў. У мінулым годзе прыйшлося нават набраць людзей па тэрміновай дамове на 3-4 месяцы. «Скарачэнняў цяпер няма, у людзей проста сканчаюцца кантракты, і гэта ўжо права наймальніка - працягваць іх ці не. Другая катэгорыя тых, хто сыходзіць сам, - людзі, якіх не задавальняе сезоннасць працы. Адна справа ў перыяд загрузкі атрымаць 6 мільёнаў, а іншая справа атрымліваць цяпер у 2 разы менш», - кажа Валянціна Сідаркевіч.
Кароткатэрміновае прыпыненне вытворчасці тлумачаць неабходнасцю рамонту канвеераў, пакуль няма вялікай загрузкі. Рабочых адпусцілі на прастой з аплатай 2/3 іх тарыфнай стаўкі. «Разліковы, які трапіў у Сетку, мы вывучылі. Тут ёсць табельны нумар, і мы без складанасцяў паднялі інфармацыю аб работніку. У лютым 17 дзён адпрацавана, прастою 3 дні. На рукі атрымаў 2 млн. 236 тыс. рублёў і аванс - 476 тысяч. Тады ў рабочых была пачасова-прэміяльная аплата. З сакавіка іх перавялі на здзельна-прэміяльную. За сакавік гэты ж чалавек пры тым, што адпрацавана тых жа 17 дзён, а пятніцы ў яго былі прастойныя, атрымаў 3 млн. 360 тыс. рублёў і аванс 386 тысяч», - прыводзіць прыклад старшыня прафкама.
Тым не менш зарплата пакуль не дацягвае да сярэдняй па краіне, а калі ўлічыць, што большасць супрацоўнікаў прадпрыемства - мужчыны, якім трэба карміць сем'і, то іх грашовае становішча робіцца незайздросным. Зрэшты, будзем спадзявацца, што пераход на поўны працоўны тыдзень у траўні зменіць сітуацыю ў лепшы бок.
У красавіку на скарочаным працоўным тыдні працаваў і МАЗ. Некаторым падраздзяленням Менскага аўтазавода зноў прапанавалі адпачываць па пятніцах, як гэта было ў сакавіку. «Пятніцы (5, 12, 19 і 26 красавіка) асобных падраздзяленняў мы сапраўды перанеслі на снежань. Зразумела, што гэта не можа не адбіцца на заробку супрацоўнікаў, але гэтыя дні будуць кампенсаваныя да канца года. Сярэдні заробак па прадпрыемству за сакавік - каля 6 млн. рублёў. Аб'ёмы вытворчасці ў нас у параўнанні з аналагічным перыядам мінулага года не сталі менш», - тлумачыць старшыня прафкама ААТ «Менскі аўтамабільны завод» Міхаіл Будай.
Зрэшты, сітуацыя пакуль не выклікае аптымізму. Рабочыя МАЗа абмяркоўваюць магчымыя канікулы з 1 па 14 траўня, кажуць пра цяжкасці са збытам айчыннай прадукцыі на расейскім рынку, што пацягнула за сабой павелічэнне запасаў аўтамабіляў і прычапной тэхнікі на складах. Так што ў бліжэйшы час загружанасць і зарплата аўтазаводцаў залежаць шмат у чым ад таго, як хутка кіраўніцтва прадпрыемства зарыентуецца ў сітуацыі, якая склалася.