Польскі міністр звольнены з-за пагаднення з «Газпрамам»
- 20.04.2013, 17:08
Прэм'ер-міністр Польшчы Дональд Туск абвясціў пра адстаўку міністра Дзяржказначэйства Мікалая Будзаноўскага.
Таксама кіраўнік польскага ўраду заклікаў да кадравых перамен ўнутры газавай манаполіі краіны PGNiG, паведаміла прадстаўнік прэм'ер-міністра. Паводле яе слоў, на месца звольненага міністра прызначаны Уладзімеж Карпінскі, які перш займаў пасаду намесніка міністра адміністрацыі і цыфравізацыі, паведамляюць «Ведомости».
Па словах прадстаўніка прэм'ер-міністра Польшчы, прычынай для звальнення Будзаноўскага стаў «нездавальняючы ўзровень зносін» паміж польскім урадам і газавымі кампаніямі.
У пачатку красавіка «Газпрам» і Europol Gaz падпісалі мемарандум, які прадугледжвае магчымасць будаўніцтва другой чаргі газаправода «Ямал-Еўропа» праз Польшчу ў напрамку Славакіі і Венгрыі да 2018 г. Яго максімальная магутнасць складзе 15 млрд куб. м газу. Падумаць пра будаўніцтва другой ніткі «Ямал-Еўропа» «Газпраму» параіў прэзідэнт Расеі Уладзімір Пуцін.
«Газпрам» падпісаў з польскай Europol Gaz мемарандум па новым газаправодзе ў Еўропу. Europol Gaz - СП «Газпрама» і PGNiG (валодаюць па 48% акцый кампаніі). СП належыць дзеючы газаправод «Ямал-Еўропа» на тэрыторыі Польшчы. Яшчэ 4% Europol Gaz - у кампаніі Gas-Trading S. A. (43,41% - у PGNiG, 36,17% - у PHZ Bartimpex Аляксандра Гудзаватага, 15,88% - у «Газпрам экспарту», па 2,27% - у Wеglokoks і Wintershall Erdgas Handelshaus). Расея даўно настойвае на выключэнні трэцяга саўладальніка з СП і пераходзе да парытэтнага валодання (эфектыўная доля PGNiG у СП дасягае 49,7%).
Расейскі бок прапанаваў падпісаць мемарандум аб магчымасці пашырэння газаправода «Ямал-Еўропа» яшчэ ў кастрычніку 2012 г., гаворыцца ў справаздачы міністэрства ўнутраных спраў Польшчы. Гэтая тэма ўзнікла ў ходзе перамоваў паміж «Газэкспартам» і PGNiG, прысвечаных змене коштавых умоў паставак расейскага газу.
Раней Дональд Туск казаў, што Варшава не зацікаўленая ў рэзкім павелічэнні імпарту газу з Расеі. А Будзаноўскі падкрэсліваў, што мемарандум не абавязвае Польшчу будаваць які-небудзь газаправод і называў дакумент «тэхнічным».