Кыргызстан будзе дамагацца ад Беларусі выдачы Бакіева і яшчэ 50 чалавек

• 24.04.2013, 17:09

Намеснік міністра МУС Кыргызстана паехаў у Менск дамагацца экстрадыцыі Бакіевых.

Пра гэта паведамляе 24.kg са спасылкай на прэс-службу Міністэрства ўнутраных спраў КР.

Мэтай камандзіроўкі прадстаўнікоў МУС і пракуратуры Кыргызстана стала наладжванне ўзаемадзеяння з праваахоўнымі органамі Беларусі па вышуку, затрыманню і экстрадыцыі злачынцаў. Гаворка ідзе пра магчымасць крымінальнага пераследу злачынцаў рознага, у тым ліку і самага высокага ўзроўню.

Намеснік міністра ўнутраных спраў Фурхат Усенаў (на фота) пацвердзіў, што ў пераліку асоб, якіх мае на ўвазе кыргызскі бок, значацца экс-прэзідэнт Курманбек Бакіеў, яго брат Жаныш Бакіеў, а таксама іншыя набліжаныя да іх асобы, якія, па наяўных дадзеных, знаходзяцца на тэрыторыі Беларусі.

У агульным пераліку, сфармаваным праваахоўнымі органамі КР, значацца каля 50 чалавек, якія могуць хавацца ў Беларусі ад кыргызстанскага правасуддзя ў рознай якасці - і крымінальных элементаў, і бежанцаў.

Нагадаем, былы правадыр Кыргызстана Курманбек Бакіеў і ягоны брат Жаныбек Бакіеў абвешчаныя ў міждзяржаўны вышук на тэрыторыі СНД і ў міжнародны вышук праз Інтэрпол. Яны абвінавачваюцца паводле артыкулаў крымінальнага кодэксу ў саўдзеле ў масавых забойствах. Кыргызскі правадыр з сям'ёй хаваецца ў Беларусі з красавіка 2010 года. Яшчэ ў жніўні 2010 года Курманбеку Бакіеву быў выдадзены пашпарт грамадзяніна Беларусі.