Грандыёзны Беларуска-літоўскі форум у Клайпедзе

• 5.04.2013, 14:43

17-19 красавіка ў Літве пройдзе IX Міжнародны Беларуска-літоўскі эканамічны форум.

Удзел у ім прыме асабіста прэм'ер-міністр Беларусі Міхаіл Мясніковіч.

Крыніца сайта charter97.org ва ўрадавых колах Літвы падала праграму мерапрыемства.

Стартуе мерапрыемства «аўтапрабегам» з Кастрычніцкай плошчы Менска да Клайпеды праз Вільню. Па дарозе дэлегаты паабедаюць у рэстаране «Старая каралеўская кібіная», у Клайпедзе паселяцца ў фешэнэбельным гатэлі «Amberton Klaipeda».

Сам форум пройдзе ў канцэртнай зале Клайпеды. З прывітальным словам выступяць прэзідэнт Канфедэрацыі прамыслоўцаў Літвы і мэр Клайпеды.

Свой даклад прадставіць прэм'ер-міністр Літвы Альгірдас Буткявічус. Тэма яго даклада - «Рэспубліка Беларусь - найважнейшы партнёр Літоўскай Рэспублікі ў эканамічнай сферы».

Прэм'ер-міністр Беларусі Міхаіл Мясніковіч выступіць з дакладам «Беларусь - Літва. Перспектывы эканамічнай інтэграцыі».

На форуме таксама пройдзе некалькі панэляў з абмеркаваннем таго, як яшчэ больш нарасціць тавараабарот паміж Беларуссю і Літвой.