«Палатнік» прапанаваў караць за «дармаедства»
- 18.06.2013, 7:59
«Дэпутаты» зноў устурбаваліся праблемай грамадзян краіны, якія афіцыйна нідзе не працуюць.
Пра тое, што «палата прадстаўнікоў» можа вярнуцца да абмеркавання праблемы «дармаедства», паведаміў яе член Аляксандр Ярашэвіч, камэнтуючы гучныя публікацыі ў СМІ пра канфлікт жыхара Давыд-Гарадка і тутэйшых непрацоўных цыганоў, перадае БелТА.
«Перад законам у нас усё роўныя: і цыганы, і беларусы, і палякі, і грамадзяне іншых нацыянальнасцяў. Я бачу тут іншую актуальную праблему нашага грамадства - утрыманства. Калі людзі не працуюць, хоць могуць, а жывуць за кошт астатняга грамадства, то трэба нешта з гэтым рабіць. І такія прыклады дармаедства ёсць паўсюдна - у кожным рэгіёне, і не толькі сярод цыганоў», - сказаў «дэпутат».
Аляксандр Ярашэвіч нагадаў, што адзін з крокаў у гэтым кірунку быў зроблены праз унясенне змен у заканадаўства аб дзіцячых дапамогах, пасля чаго ўсе сем'і, якія выхоўваюць дзяцей ва ўзросце да 3 гадоў, сталі атрымліваць аднолькавыя выплаты. «Палатнік» дадаў, што праблема злоўжывання статусам самотнай маці была вельмі актуальная ў Беларусі. Ён таксама паведаміў, што «дэпутатам» паступае нямала зваротаў, дзе гаворыцца і пра іншы бок сацыяльнага ўтрыманства. У некаторых сем'ях ужо дарослыя дзеці не працуюць, а папросту забірюць пенсію ў састарэлых бацькоў. Прычым гэта адбываецца і ў гарадах, і ў вёсцы.
«Думаю, што мы вернемся да гэтага пытання і разбярэмся, каб сапраўды кожны зарабляў сам. Адназначна трэба развязваць гэтае пытанне, але не сілавымі метадамі, не кулакамі, а дэмакратычна. Трэба прадумаць ўсе моманты. Напрыклад, ёсць людзі, якія паводле стану здароўя не могуць працаваць», - адзначыў ён.
«Ва ўсіх дзеці ходзяць у школу, дзіцячыя сады, людзі звяртаюцца ў дзяржаўныя ўстановы аховы здароўя. Таксама ўсе карыстаюцца грамадскім транспартам, дзе тарыфы для насельніцтва ніжэйшыя за сабекошт. Гэта значыць, карыстаюцца аднолькавымі дабротамі. Значыць, усе павінны і папаўняць дзяржаўны скарб, плаціць падаткі. Але, вядома, тым, хто нямоглы, дзяржава павінна дапамагаць», - сказаў на заканчэнне Аляксандр Ярашэвіч.
Нагадаем, у снежні мінулага года зрабіць захады ў дачыненні да грамадзян краіны, якія афіцыйна нідзе не працуюць, прапаноўваў віцэ-прэм'ер Анатоль Тозік.
Важна адзначыць, што шмат якія беларусы не маюць афіцыйнага месца працы альбо выязджаюць на сэзонныя работы за мяжу. Найперш гэта датычыцца рабочых будаўнічых спецыяльнасцяў.
Фота: obozrevatel.com