Анішчанка аб'яўляе малочную вайну Беларусі

• 28.08.2013, 15:28

У расейскай санітарнай службы з'явіліся заўвагі да якасці малочнай прадукцыі з Беларусі.

Пра гэта паведаміў кіраўнік Расспажыўнагляду, галоўны дзяржаўны санітарны ўрач Расеі Генадзь Анішчанка, піша «Інтэрфакс».

«Толькі ў Маскоўскай вобласці было абследавана 240 узораў беларускай малочнай прадукцыі. З іх 72 узоры або 30% не адпавядалі па паказчыках якасці і бяспекі», - сказаў кіраўнік Расспажыўнагляду.

Ён выказаў надзею, што «беларускі бок прыме меры ў адпаведнасці з тымі дамоўленасцямі, якія ў нас былі дасягнутыя ў пачатку жніўня падчас візіту ў Маскву беларускай дэлегацыі».

«Мы разлічваем на адпаведную рэакцыю для вызначэння далейшых дзеянняў з боку Расеі», - сказаў ён.

«Вымушаныя канстатаваць, што ў рэгіёнах, якія з'яўляюцца асноўнымі спажыўцамі беларускай прадукцыі, перш за ўсё малочнай, за апошні час мы рэгістравалі факты продажу прадукцыі, якая не адпавядае артыкулу 36 Тэхнічнага рэгламенту на малако і малочную прадукцыю», - сказаў Анішчанка.