Афіцыйныя эканамісты прапануюць дэвальвацыю

• 7.08.2013, 17:40

У кароткатэрміновай перспектыве мэтазгодна правесці паступовую мяккую дэвальвацыю нацыянальнай валюты.

Такое меркаванне выказвае першы намеснік дырэктара Навукова-даследчага эканамічнага інстытута Мінэканомікі Віктар Пінігін ў артыкуле, апублікаваным у ліпеньскім нумары «Экономического бюллетеня», які выдаецца інстытутам, паведамляе БелаПАН.

На думку Пінігіна, у цяперашні час «адбываецца досыць хуткае ўмацаванне рэальнага курсу беларускага рубля (узровень інфляцыі значна вышэй узроўню дэвальвацыі)».

«У выніку хутка губляюцца тыя канкурэнтныя перавагі, якія атрымалі беларускія тавары ў выніку дэвальвацыі рубля ў 2011 годзе. З іншага боку, Нацыянальны банк працягвае скупляць валюту на валютнай біржы, каб не дапусціць празмернага ўмацавання беларускага рубля», - канстатуе Пінігін ў артыкуле, апублікаваным у бюлетэні.

На думку эканаміста, дзеянні Нацбанка дазваляюць папаўняць золатавалютныя рэзервы.

«Падаецца, што ў кароткатэрміновай перспектыве мэтазгодна ў інтарэсах павышэння канкурэнтаздольнасці беларускай эканомікі правесці паступовую мяккую дэвальвацыю нацыянальнай валюты на аснове задавальнення ўзрастаючага попыту на замежную з боку дзяржавы, улічваючы, што яна сапраўды ў ёй мае патрэбу», - адзначае першы намеснік дырэктара НДЭІ Мінэканомікі.

Тэмпы дэвальвацыі нацвалюты варта ўвязаць з дынамікай паслаблення курсу расейскага рубля, мяркуе эканаміст.

«У якасці мэты можна было б узяць індэкс дэвальвацыі расейскага рубля да даляра ЗША, праведзенай у Расеі з пачатку года ў інтарэсах абароны нацыянальнага рынку ва ўмовах уступлення ў СГА (замест тарыфнай абароны) і павышэння коштавай канкурэнтаздольнасці на сусветным рынку расейскіх таваравытворцаў», - мяркуе Пінігін.