БелТА адцэнзуравала Лукашэнку (Відэа)

• 30.09.2013, 16:09

Афіцыйнае інфармагенцтва выразала словы Лукашэнкі пра «народзец, які пабег у абменнікі».

Адказваючы на пытанні журналістаў у Жлобіне, беларускі кіраўнік заявіў, што ў будучай дэвальвацыі вінаватыя самі беларусы.

«На сённяшні дзень, калі ў цэлым па годзе ўзяць, то мы пакуль, напэўна, мільёнаў на 150-200, я дакладна не памятаю, набылі больш валюты, чым прадалі. Але ў апошнія месяцы, я гляджу, наш народзец пабег у абменныя пункты. Ну, бяжыце. Бяжыце! Будзе попыт на валюту вялікі - будзе абясцэньвацца беларускі рубель з усімі вынікаючымі наступствамі. Не будзе попыту - будзе спакойная сітуацыя на рынку. Гэта я кажу ўжо ў другі раз за апошні месяц. Мы ўжо навучаныя горкім вопытам. Яшчэ раз падкрэсліваю: ваш лёс у гэтым плане ў вашых руках», - адзначыў ён.

Ужыванне абразлівага вызначэння «народзец» абурыла многіх беларусаў.

У сваім рэпартажы афіцыйнае інфармацыйнае агенцтва БелТА выразала менавіта гэтую скандальную фразу. Выказванне павінна было прагучаць у канцы першай хвіліны, на адзнацы 1:59.