За партрэты Статкевіча на майках - штрафы

• 30.09.2013, 17:15

Футболкі з партрэтам Мікалая Статкевіча суд ацаніў у 2 мільёны за кожную.

Жонка палітвязня Мікалая Статкевіча Марына Адамовіч правяла ўвесь дзень каля суда, дзе толькі пасля абеду стартаваў працэс над супрацоўнікамі інтэрнэт-праекта Serabranka.by, затрыманымі ў суботу з-за «забароненых» маек.

Марына Адамовіч такім чынам выказала салідарнасць з супрацоўнікамі інтэрнэт-праекта Serabranka.by, якія ў суботу прыйшлі на фестываль бегу ў футболках з надпісам «Серабранка - за спорт, Беларусь і Статкевіча», пасля чаго апынуліся на нарах Акрэсціна, піша «Салідарнасць».

Кіраўнік рэсурсу Кірыл Жываловіч, якога ў суботу з аддзялення міліцыі адпусцілі пасля ўмяшання прэс-сакратара ГУУС Менгарвыканкама Аляксандра Ластоўскага, у панядзелак раніцай прыйшоў (як і ўсе неабыякавыя) да суда Цэнтральнага раёна з рэчамі.

- Я аддаю сабе справаздачу, які можа быць прысуд. Таму ўзяў з сабой рэчы, каб перадаць іх хлопцам, калі ім дадуць яшчэ суткі, - сказаў Кірыл Жываловіч журналістам, якія сабраліся каля будынка суда.

Таксама ён дадаў, што майкі з партрэтам Статкевіча ва ўсіх іх канфіскавалі яшчэ ў аддзяленні міліцыі - у якасці рэчдоказа.

Яго калег – Яўгена Напорку, Максіма Дубоўскага і Андрэя Вісловіча, якія дзве ночы правялі ў ізалятары на Акрэсціна, - прывезлі на працэс толькі ў 14.20. З майкамі.

Арыштантаў закрылі ў зале пасяджэнняў грамадзянскіх спраў, куды нікога з журналістаў не пусцілі. Пазней кожнага з чатырох судзілі па асобнасці. Сведкі - спецназаўцы - звярталі ўвагу суда, што падсудныя на марафоне бегу былі апранутыя ў гэтыя майкі, і сваім выглядам прыцягвалі да сябе ўвагу. Рэпарцёры на фестывалі бегу рыхтаваліся да эстафеты побач з камандай Serabranka.by і адзначылі, што яе ўдзельнікі вялі сябе спакойна, не пікетавалі, некаторыя нават былі апранутыя ў курткі, што выразна відаць на відэазапісы.

Тым не менш суд прыгаварыў іх да штрафу - па 2 млн рублёў з кожнага.

Прадстаўнікі Serabranka.by абвінавачваліся па ч. 1 арт. 23.34 КаАП (парушэнне ўстаноўленага парадку правядзення сходу, мітынгу, вулічнага шэсця, дэманстрацыі, пікетавання і г.д.).

Прычынай затрымання, сталі футболкі, у якіх каманда хацела прыняць удзел у забегу на дабрачынным фестывалі бегу ў Менску. На іх, у прыватнасці, быў размешчаны партрэт экс-кандыдата ў прэзідэнты, а таксама надпіс «Серабранка - за спорт, Беларусь і Статкевіча».