Сальда бягучага рахунку плацёжнага балансу - мінус 3 мільярды даляраў

• 5.09.2013, 12:39

У параўнанні са студзенем-траўнем сальда скарацілася на 301,6 мільёнаў даляраў.

У цэлым па выніках студзеня-чэрвеня 2013 г. сальда бягучага рахунку плацёжнага балансу склалася адмоўным у памеры 3 066,9 млн. даляраў ЗША (у студзені-чэрвені 2012 г. - 752,5 млн. даляраў ЗША).

У адносінах да ВУП дадзеныя паказчыкі склалі адпаведна мінус 9,3 адсотка і 2,5 адсотка, гаворыцца ў аналітычным аглядзе Нацбанка «Асноўныя тэндэнцыі ў эканоміцы і грашова-крэдытнай сферы Рэспублікі Беларусь» за студзень-ліпень 2013 г.

Сальда першасных даходаў у студзені-чэрвені 2013 г. склалася адмоўным у памеры мінус 1 889,7 млн. даляраў ЗША, яно пагоршылася ў 2,1 разы да студзеня-чэрвеня 2012 г., што звязана з выплатамі даходаў прамым інвестарам. Па артыкуле другасных даходаў сальда таксама сфармавалася адмоўнае ў суме мінус 1 563,4 млн. даляраў ЗША супраць мінус 1 920,1 у студзені-чэрвені 2012 г.

Па фінансавым рахунку плацёжнага балансу чысты прыток капіталу склаў 2 555,8 млн. даляраў ЗША (7,8 адсотка да ВУП) супраць чыстага адтоку ў памеры 1781 млн. даляраў ЗША (мінус 6 адсоткаў да ВУП) у студзені-чэрвені 2012 г.

Прамыя інвестыцыі ў эканоміку краіны склалі 1 634,4 млн. даляраў ЗША, павялічыўшыся ў 2,3 разы ў параўнанні са студзенем-чэрвенем 2012 г. Рэінвеставанне даходаў склала 71,8 адсотка ад агульнага аб'ёму прамых інвестыцый.

Па аперацыях Урада і Нацыянальнага банка на чыстай аснове выплачана 142,4 млн. даляраў ЗША, што абумоўлена пагашэннем Рэспублікай Беларусь знешніх абавязацельстваў, у тым ліку асноўнай пазыкі па крэдыце МВФ.

Прыцягненне капіталу ў банкаўскі сектар склала 1 064,8 млн. даляраў ЗША, забяспечанае ў асноўным прыцягненнем доўгатэрміновых крэдытаў і пазык.

Па нефінансавым сектары перавышэнне выплат над запазычаннем капіталу склалася ў памеры 1 млн. даляраў ЗША.

Такім чынам, па выніках студзеня-чэрвеня 2013 г. сфармавалася адмоўнае агульнае сальда плацёжнага балансу на ўзроўні 278,8 млн. даляраў ЗША (мінус 0,8 адсотка да ВУП), прафінансаванае прыцягненнем чацвёртага і пятага траншаў стабілізацыйнага крэдыту Антыкрызіснага фонду ў памеры 880 млн. даляраў ЗША. У студзені-чэрвені 2012 года сальда плацёжнага балансу складала мінус 5 млн. даляраў ЗША.