Затрыманыя 16 «беркутаўцаў» і 5 экс-афіцэраў СБУ, датычных да расстрэлу Нябеснай сотні

• 18.11.2014, 14:05

Служба бяспекі Украіны правяла шэраг спецаперацый.

Служба бяспекі Украіны затрымала 16 байцоў былой роты спецыяльнага прызначэння «Беркут» і 5 афіцэраў СБУ, датычных да расстрэлу мірных мітынгоўцаў на Майдане ў лютым гэтага года.

Пра гэта ў аўторак, 18 лістапада, заявіў кіраўнік СБУ Валянцін Налівайчанка, паведамляе карэспандэнт НБН.

«Паводле стану на сёння я пацвярджаю папярэднія даклады мае і маіх калегаў, што ў сакавіку-красавіку сумесна з міністрам Авакавым СБУ было праведзена шэраг спецаперацый, паводле вынікаў якіх былі затрыманыя і арыштаваныя 16 афіцэраў былога «Беркута», найбольш небяспечныя і тыя, супраць каго больш за ўсё было падазрэнняў у пракуратуры што да стрэлаў у пратэстуючых на Майдане, у мірных людзей», - заявіў Налівайчанка.

Акрамя таго, з яго слоў у самой СБУ затрыманыя і арыштаваныя 5 высокапастаўленых афіцэраў паводле артыкула «дзяржаўная здрада».

«Апошнія нашы арышт і затрыманне - гэта нумар 3 з былых кіраўнікоў СБУ, якія найбольш расшукваюцца і наўпрост маюць дачыненне да арганізацыі і ўчынення злачынстваў супраць грамадзян, грамадзянскіх людзей на Майдане. Генерал, які раней ачоліў адзін з дэпартаментаў контрвыведкі ў СБУ», - удакладніў кіраўнік СБУ.

Затрыманы сустракаўся з афіцэрамі ФСБ у снежні 2013 года і студзені-лютым 2014 года ў Кіеве. Цяпер арыштаванага дапытваюць супрацоўнікі праваахоўных органаў.

4 кастрычніка Пячэрскі раённы суд Кіева задаволіў хадайніцтва Галоўнага следчага ўпраўлення Генеральнай пракуратуры і даў дазвол на затрыманне камандзіра роты спецыяльнага прызначэння «Беркута» Дзмітрыя Садоўніка, які падазраецца ў датычнасці да расстрэлу ўдзельнікаў акцый пратэсту на вул. Інстытуцкай.