МТС не будзе выкупляць дзяржаўную долю ў беларускай «дачкі» па кошце Лукашэнкі
- 25.05.2014, 19:33
Пакупка дзярждолі ў СТАА МТС магчымая, але не па завышанай цане.
Пра гэта заявіў агенцтву «Бизнес-новости» прэзідэнт групы МТС Андрэй Дубоўскі на прэс-сняданку ў Санкт-Пецярбургу.
«Калі раней беларуская старана a href=/ru/news/2013/10/10/77364/>называла лічбу USD 1 млрд, то нядаўна стала вядома, што праведзеная ацэнка, паводле вынікаў якой названы кошт актыву – USD 863 млн. Наша пазіцыя нязменная – пакупка магчымая, але па кошце, супастаўным з мультыплікатарамі, па якіх гандлюецца МТС», – пракаментаваў Дубоўскі магчымасць пакупкі беларускай дзярждолі ў СТАА «Мабільныя ТэлеСістэмы».
Топ-менеджэр расейскай кампаніі растлумачыў, што «цяпер капіталізацыя МТС складае 3-4 EBITDA – гэта нейкі індыкатыў для разумення таго, з чаго мы зыходзім пры ацэнцы актыву. Калі нам прапануюць купіць штосьці па цане з мультыплікатарам 6 або 10 EBITDA, гэта будзе размываць наш акцыянерны капітал і асноўныя акцыянеры і мінарытарыі, скажуць: «Вы абясцэньваецца гэтай пакупкай інвестыцыі, якія мы зрабілі ў вашу кампанію». Вось чаму мы не можам купіць нешта, што даражэйшае за рынкавы кошт».
Пры гэтым Дубоўскі падкрэсліў, што магчымасць трохі адступіць ад цаны ёсць, адмовіўшыся назваць канкрэтныя лічбы. «Пэўныя крокі насустрач адзін аднаму стораны зрабілі, але пастановы пакуль няма», – сказаў на заканчэнне прэзідэнт групы МТС.
Адзначым, што паказчык EBITDA (чысты прыбытак да выплаты падаткаў, выдаткаў на амартызацыю і працэнтаў крэдытаў) СТАА «МТС» не выдае. Паказчык OIBDA (аперацыйная прыбытак да выліку зносу асноўных сродкаў і амартызацыі нематэрыяльных актываў) кампаніі склала паводле вынікаў 2013 BYR 2 088,0 млрд, што на 45% больш, чым у 2012 годзе. У пераліку на даляры ЗША па сярэднегадавым курсу за 2013 ён склаў USD 235,2 млн.
Дубоўскі адзначыў, што МТС задаволеная ўмовамі вядзення бізнесу ў Беларусі. Топ-менеджэр дадаў, што ў Беларусі МТС – вядучы мабільны аператар па выручцы і маржынальнасці.
«У мінулым годзе мы запусцілі ў адным з раёнаў Менска пілотны праект па фіксаванай сувязі Ethernet, і ён ужо паказвае станоўчыя вынікі. У гэтым бізнесе адна з галоўных праблем – сатурацыя сетак абанентамі. Калі ты правёў сетку ў шматкватэрны дом на сто кватэр, а падключылася ўсяго пяць, гэта неэфектыўны падыход з пункту гледжання інвестыцый. У Беларусі добрыя паказчыкі па колькасці падлучальных абанентаў на наяўных сетках. Мы гэты праект працягнем», – сказаў Дубоўскі.
Са словаў віцэ-прэзідэнта па маркетынгу групы МТС Васіля Лацаніча, была асцярога, што праект Ethernet ў Беларусі апынецца дарагім. «У Расеі, як правіла, бюджэту заўсёды аказваецца недастаткова, а ў Беларусі нашы калегі прапанавалі будаваць далей, бо засталося шмат грошай. Пры гэтым для разліку каштарысу будаўніцтва браліся сярэднія дадзеныя па расейскіх рэгіёнах. Але аказалася, што ў Беларусі можна будаваць якасна, але ў два разы танней. Для нас гэта стала прыемнай нечаканасцю», – адзначыў Лацаніч.
Таксама віцэ-прэзідэнт па маркетынгу адзначыў, што МТС плануе ўдзельнічаць у конкурсе на LTE-частоты, падкрэсліўшы, што пастанова будзе прымацца зыходзячы з камерцыйнай мэтазгоднасці пры выстаўленні разумнай цаны за частоты.
Лукашэнка ў канцы лістапада 2012 г пацвердзіў магчымасць продажу дзярждолі (51%) у беларуска-расейскім ТАА «Мабільныя ТэлеСістэмы» (МТС), але не менш, чым за $1 млрд.