Даляр на таргах у Менску пераваліў за 15 тысяч

• 14.01.2015, 12:16

Беларускі рубель рэзка абваліўся на таргах серады.

Таргі на Беларускай валютна-фондавай біржы сёння раніцай былі прыпыненыя пасля імклівага росту расейскага рубля, ён вырас з 221,5 да 228,5 беларускага рубля, больш чым на 3%.

Калі пралічыць крос-курс да даляра, то амерыканская валюта павінна была перайсці рысу ў 15 тысяч рублёў, піша «Наша Нiва».

Пасля аднаўлення таргоў было абвешчана, што амерыканская валюта падаражэла з 14 330 да 15 010 рублёў, на 4,7%.

Еўра тым часам вырасла з 16 960 да 17 710 рублёў.

Учора прырост курсу даляра быў невялікім, усяго 20 рублёў. Розніца паміж попытам і прапановай на таргах імкліва з кожным днём станавілася меншай. Напрыклад, учора нездаволенымі засталіся заяўкі на $7 мільёнаў.

Аднак нягледзячы на ўяўную стабілізацыю курсу, даляраў у абменніках у свабодным доступе дагэтуль не было. Каля банкаў стаяць чэргі жадаючых набыць даляры і еўра ў чаканні, калі хтосьці прадасць іх банку.