Тыя, хто атрымліваюць заробак у канвертах - таксама «дармаеды»

• 19.01.2015, 8:10

Дармаедамі з'яўляюцца таксама тыя, хто атрымліваюць заробак у канверце.

Пра гэта ў эфіры тэлеканала «Беларусь 1» заявіў міністр падаткаў і збораў Сяргей Налівайка.

Тлумачачы паняцце сучаснага дармаедства, ён сказаў, што з адной катэгорыі гэта асобы, якія вядуць асацыяльны лад жыцця, а з другой - «свайго роду сацыяльныя ўтрыманцы, асобы, якія займаюцца нелегальным бізнэсам, атрымліваюць заробак у канвертах і не ў поўным аб'ёме выплачваюць падаткі».

Разам гэтыя дзве катэгорыі і з'яўляюцца дармаедамі, дадаў міністр.

Сяргей Налівайка адзначыў, што ў праекта дэкрэта аб стымуляванні працоўнай занятасці грамадзян прадугледжана норма, якая дазволіць грамадзяніну давесці, што ён не з'яўляецца дармаедам. «Грамадзянін мае права прыйсці ў падатковую інспекцыю, прадставіць дакументы, якія пацвярджаюць, што ён не з'яўляецца дармаедам, што ён удзельнічае ў фінансаванні дзяржаўных расходаў, і гэта будзе прынята. Калі нават будзе дапушчана памылка на ўзроўні падатковай інспекцыі, то ў грамадзяніна ёсць права звярнуцца ў суд», - праінфармаваў міністр.

На думку Сяргея Налівайкі, для эфектыўнай барацьбы з дармаедствам неабходна ўзмацняць меры адказнасці, ствараць атмасферу нецярпімасці да гэтай з'явы ў грамадстве, а таксама ўзмацняць прафілактычную працу, у тым ліку ў лініі падатковых органаў.