Украіна на трэць павялічыла імпарт газу з ЕЗ

• 26.01.2015, 12:37

Такім чынам, дзённыя пастаўкі газу з ЕЗ перавышаюць імпарт з РФ прыкладна на 10%.

Украіна з 25 студзеня павялічыла імпарт прыроднага газу з Еўразвязу на 30% - да 42,7 млн куб. м у дзень, паведаміў кіраўнік праўлення НАК «Нафтагаз Украіны» Андрэй Кобалеў, паведамляе УНИАН.

«Добрая навіна ў гэты сумны дзень прыйшла з ЦДУ (Цэнтральнае дыспетчарскае кіраванне - УНИАН): Дата: 2015/01/25. Паступленні для Украіны: ... у т. л. з краін ЕЗ: 42,7 (млн куб. м)», - напісаў 25 студзеня Кобалеў на сваёй старонцы ў сацсетцы «Фэйсбук».

Такім чынам, дзённыя пастаўкі газу з ЕЗ перавышаюць імпарт з РФ прыкладна на 10%.

Як паведамлялася, у 2014 годзе імпарт газу з Расейскай Федэрацыі скараціўся ў параўнанні з 2013 годам на 44% - да 14,5 млрд кубаметраў, з ЕЗ - вырас удвая, да 5,1 мільярдаў кубаметраў.