Эксперымент назіральнікаў у Берасці выкрыў фальсіфікацыі на «выбарах»

• 19.10.2015, 9:08

На трох берасцейскіх выбарчых участках №1, 53, 60 быў праведзены эксперымент.

Выбаршчыкі выносілі з сабой свае, выдадзеныя ім сябрамі камісіі, бюлетэні для галасавання, а ў выбарчыя скрыні кідалі белыя лісты паперы, піша «Беларускі партызан».

На двух участках белыя пустыя лісты ператварыліся ў "галасы", а на ўчастку №1 гэты фокус не прайшоў. Як пазней высветлілася, з прычыны таго, што назіральнік АБСЕ зрабіў фатаграфію адбітку пячаткі на ўрне. Гэтую скрыню пабаяліся ўскрыць і апячатаць паўторна.

Назіральнік Сяргей Пятрухін зняў невялікі відэаролік пра гэты эксперымент.

Нагадаем, 9 кастрычніка актывіст руху «За свабоду» Дзяніс Турчаняк прыйшоў на гэты выбарчы ўчастак, дзе яму далі бюлетэнь для галасавання і прапанавалі прайсці ў кабіну для галасавання, што ён і зрабіў. Аднак замест бюлетэня кінуў у скрыню для галасавання аркуш паперы, пасля чаго выйшаў з тэрыторыі ўчастка, а бюлетэнь панёс з сабой.

Затым ён зарэгістраваўся на гэтым выбарчым участку ў якасці назіральніка, каб пабачыць на свае вочы, як адаб'ецца ў справаздачнасці выбарчай камісіі недахоп яго бюлетэня пры падліку галасоў 11 кастрычніка 2015 г.

У скрыні датэрміновага галасаванне не аказалася лістоў паперы, якія былі кінутыя замест бюлетэняў актывістам і астатнімі грамадзянамі, што з'яўляецца сведчаннем несанкцыянаванага доступу да змесціва скрыні. Ён робіць выснову, што «лісты паперы былі канфіскаваныя са скрыні неўсталяванай асобай і замененыя на фальшывыя бюлетэні».

Дзяніс Турчаняк падаў заяву пракурору Берасця аб распачынанні крымінальнай справы «паводле факту падробкі дакументаў і заведама няправільнага падліку галасоў на выбарчым участку №60 Маскоўскага раёна Берасця».