Статкевіч пра ежу ў калоніі: У тазіку з бурай жыжкай спрабуем знайсці рыбу

• 17.02.2015, 9:53

Палітвязень распавёў, чым кормяць зняволеных у калоніі.

Марыне Адамовіч, жонцы Мікалая Статкевіча, стала вядома, што 2 лютага ён напісаў заяву начальніку калоніі з просьбай праверыць ці адпавядае колькасць мяса і рыбы, што атрымліваюць зняволеныя, нормам, устаноўленым пастановай і паведаміць яму вынікі праверкі, піша сайт палітыка.

«Тут, у тазіку, напоўненым бурай жыжкай, зняволеныя чарпаком спрабуюць знайсці астаткі рыбы. Гэта відовішча, якое прыніжае чалавечую годнасць», - ахарактарызаваў харчаванне ў шклоўскай калоніі №17 палітвязень Мікалай Статкевіч.

«Мікалай паведаміў, што параўнанне харчавання ў калоніі і турме апынулася відавочна не на карысць калоніі, хоць у калоніі нашмат менш людзей - 1300 чалавек, у турме было 2000, але нават там кармілі лепш, хоць нормы там горшыя», - распавяла Марына Адамовіч.

У парушэнне «тэхналагічных карт», тут мяса, жылы, косткі, храсткі перамолваюць на магутнай мясарубцы з малымі адтулінамі. Гэта і называецца «мясам». Так апісвае Мікалай Статкевіч ежу ў калоніі.

Даслоўна праз дзень, 4-га лютага палітвязню патлумачылі, што «закладка» мяса ў ежу адбываецца «пад кантролем асуджаных». «Гучала гэта добра, але зусім не супадала з жорсткай рэальнасцю, якую я бачу ў сваёй талерцы. Калонія павінна з'ядаць за дзень 120 кг мяса. Добрыя грошы для добрых «тэхнолагаў», - напісаў палітвязень.

У траўні 2011 года суд Ленінскага раёна Менска прыгаварыў Статкевіча да шасці гадоў пазбаўлення волі паводле абвінавачвання ў арганізацыі масавых беспарадкаў у дзень прэзідэнцкіх выбараў 19 снежня 2010 года. Першапачаткова апазіцыйны палітык утрымліваўся ў шклоўскай калоніі №17, аднак у студзені 2012 года яму зрабілі больш жорсткімі ўмовы адбыцця пакарання, перавёўшы на тры гады ў магілёўскую турму №4. Гэты тэрмін скончыўся 12 студзеня.

58-гадовы Мікалай Статкевіч - адзіны кандыдат у прэзідэнты Беларусі, які дагэтуль знаходзіцца ў зняволенні.