Сябры Нямцова не вераць у адсутнасць замоўцаў ягонага забойства
- 10.03.2015, 14:53
Сябры і паплечнікі Барыса Нямцова ўважаюць за недарэчную версію пра тое, што ў гучнага забойства нібыта не было замоўцаў.
Блізкія забітага палітыка людзі мяркуюць, што следчыя за мінулыя выхадныя сапраўды затрымалі выканаўцаў расправы з палітыкам, аднак упэўненыя, што замоўцы злачынства сярод пецярых арыштаваных няма. Прынамсі, пра гэта заявілі паплечнік Барыса Нямцова па партыі РПР-ПАРНАС і руху "Салідарнасць" Ілля Яшын, апазіцыянер Міхаіл Касьянаў і адвакат забітага палітыка Вадзім Прохараў.
"Росбалт" са спасылкай на крыніцу ў праваахоўных органах паведаміў, што забойства Нямцова спланавалі і выканалі два былыя чальцы чачэнскага спецбатальёна "Поўнач" Заур Дадаеў і Бяслан (Біслан) Шаванаў. Дадаеў, які з'яўляецца дзейным супрацоўнікам МУС Чачні, знаходзіцца пад арыштам. Шаванаў загінуў у Грозным пры затрыманні, нібыта зладзіўшы самападрыў пры дапамозе гранаты.
Як паведамілі СМІ, Дадаеў прызнаўся, што забіў Нямцова праз ягоныя негатыўныя выказванні пра прарока Мухамеда. У расейскай апазіцыі раскрытыкавалі такую згадку аб прычынах злачынства. "Я не веру ў "ісламскія матывы" забойства і ўважаю гэтую версію за недарэчную", - заявіў Ілля Яшын "Інтэрфаксу" ў аўторак. Паводле ягоных слоў, Нямцоў быў памяркоўным у рэлігійным плане чалавекам і ніколі не казаў дрэннага пра іслам.
"Я перакананы, што стралялі ў яго з палітычных прычын, а не праз абразу рэлігійных пачуццяў", - рэзюмаваў Яшын. Як выказаў здагадку апазіцыянер, замоўцы злачынства могуць быць звязаныя з уладнымі структурамі ўнутры краіны. "Асабістых ворагаў у Чачні ў Нямцова не было", - адзначыў апазіцыянер, дадаўшы, што ў той жа час ягоны паплечнік сістэматычна падвяргаў крытыцы ўлады Чачэнскай рэспублікі.
"Я дапускаю, што арыштаваныя рэальныя выканаўцы злачынства, хоць довадаў гэтага па-ранейшаму недастаткова", - сказаў Яшын. Ён выказаў меркаванне, што следству варта працягнуць пошук замоўцаў забойства і не давяраць прызнанням Дадаева, які, імаверна, спрабуе "выгарадзіць рэальных замоўцаў". Калі следства спыніцца на гэтай версіі, практыка палітычных забойстваў працягнецца", упэўнены апазіцыянер.
Яшын выказаў здагадку, што напісаныя ў Instagram кіраўніком Чачні Рамзанам Кадыравым словы пра тое, што Дадаеў - "сапраўдны патрыёт Расеі", імаверна, з'яўляюцца "публічнай часткай" угоды ў прыкрыцці змоўцаў.
Паводле версіі Яшына, сілавікі атрымалі "відавочны знак з Крамля" аб тым, што затрыманне Дадаева і ягонага памочнікаў павінна стаць фіналам справы і "далейшае расследаванне непажаданае". Апазіцыянер пракаментаваў і ўручэнне Пуціным Кадыраву ордэна Пашаны, якое прэс-сакратар прэзідэнта Дзмітрый Пяскоў ужо назваў выпадкова супаўшым з арыштамі паводле справы Нямцова. На думку Яшына, уручэнне дзяржузнагароды "выглядае як свайго роду ахоўная грамата", якой Пуцін дэманструе "палітычную абарону Кадыраву і фактычна ставіць яго ў разрад недатыкальных".
"Фактычны адмову следства ўсталёўваць рэальных замоўцаў забойства Нямцова наўпрост ставіць пытанне аб магчымай датычнасці да гэтага злачынства персон, надзеленых высокай дзяржаўнай уладай. Акрамя таго, гэта стварае пагрозу таго, што практыка палітычных забойстваў працягнецца", - упэўнены Яшын.
У іншым паведамленні ў сацыяльнай сетцы "Фэйсбук" Яшын наўпрост абвінаваціў Кадырава ў арганізацыі забойства, напісаўшы: "Кожнаму аб’ектыўнаму чалавеку відавочна: крывавы след з Вялікага Маскварэцкага моста (дзе забілі Нямцова) вядзе наўпрост у кабінет Кадырава".
Напярэдадні ў інтэрв'ю выданню Spektr Яшын назваў "галоўным бенефіцыярам, галоўным атрымальнікам выгады" смерці Нямцова Пуціна. Ён заклікаў следчых дапытаць прэзідэнта ў якасці сведкі. "Я не магу вінаваціць яго наўпрост, не вядома, хто аддаў загад, але відавочна, што варта шукаць заказчыкаў ва ўладзе", - заявіў Яшын.
Блізкі сябар і адвакат Нямцова Вадзім Прохараў таксама сумняваецца ў тым, што затрыманыя паводле справы Нямцова самі арганізавалі злачынства. "Я дапускаю, што затрыманыя - тыя самыя людзі, якія з'яўляюцца выканаўцамі забойства", - сказаў ён у гутарцы з выданнем gazeta.ru. Аднак, падкрэсліў юрыст, ён "зусім не верыць", што гэтыя людзі "з'яўляюцца адначасова і арганізатарамі, і замоўцамі".
Як выказаў здагадку адвакат, па ўсёй верагоднасці, затрыманыя яшчэ не ўсе ўдзельнікі злачынства. Прохараў не стаў, як Яшын, выказваць адважных здагадак з нагоды асоб заказчыкаў, аднак даводзіць, што да забойства Нямцова, імаверна, датычныя прадстаўнікі спецслужбаў - былых або дзейных, паколькі людзі, якія нядаўна прыехалі з Чачні, не маглі самастойна так дакладна спланаваць забойства ля сцен Крамля. Як адзначыў Прохараў, ён "здагадваецца", хто рэальны замоўца, "з улікам біяграфіі гэтых дзеячаў" (арыштаваных). Канкрэтызаваць свае здагадкі адвакат не стаў.
Адзначым, што, кажучы пра біяграфію арыштаваных, Прохараў імаверна, меў на ўвазе іх сувязь з праваахоўнымі органамі Чачні. Паводле звестак "Каўказскага вузла", Эскерханаў раней быў супрацоўнікам РАУС Шэлкаўскага раёна Чачні, аднак некалькі гадоў таму звольніўся і пераехаў у Маскву, дзе да арышту працаваў прыватным ахоўнікам. Маці Дадаева раней паведаміла НТВ, што яе сын у якасці супрацоўніка МУС браў удзел у нейтралізацыі баевікоў, якія нядаўна напалі на Дом Друку ў Грозным.
Былы кіраўнік расейскага ўрада, апазіцыянер Міхаіл Касьянаў таксама не сумняваецца, што былі затрыманыя рэальныя выканаўцы, і таксама не бачыць сярод іх арганізатараў і замоўцаў. "Следчыя ўсяляк спрабуюць пазбегнуць версіі палітычнага забойства і знайсці тое, што можа быць больш ці менш прынятае грамадскасцю", - заявіў Касьянаў. На думку апазіцыянера, матывам забойства з'яўляецца палітычная расправа.
У панядзелак многія апазіцыянеры заявілі, што ўскласці адказнасць на ваяўнічы іслам - зручны спосаб стварыць уражанне, што злачынства хутка раскрытае, і адцягнуць увагу ад Крамля, піша з нагоды прасоўвання ў прэсе версіі забойства Нямцова газета The New York Times.
Журналіст Нэйл Макфарк’юхар адзначае, што, на думку сяброў Нямцова, менавіта жорсткая крытыка апазіцыянера ў адрас расейскага ўрада ў выніку зрабіла яго мішэнню для забойцаў. "Нямцоў таксама крытыкаваў Кадырава, апошнім разам - за правядзенне параду ягонага асабістага ваенізаванага фармавання ў Чачэніі і клятвы, што ягоныя людзі могуць зрабіць усякую паслугу ў імя Расеі", - нагадвае аўтар артыкула.
Як адзначаецца ў матэрыяле, які цытуе InoPressa, для расейцаў галоўнае пытанне складаецца ў тым, хто быў замоўцам забойства Нямцова. Апазіцыянеры абвінавачваюць урад у саўдзеле. У Крамлі адразу ж усклалі віну на "правакатараў", у якіх былі планы ачарніць улады, гаворыцца ў артыкуле.
Нагадаем, згодна з галоўнай версіяй, непасрэдным выканаўцам забойства Нямцова з'яўляецца былы намеснік камандзіра чачэнскага батальёна "Поўнач" Заур Дадаеў. Крыніца ў праваахоўных органах паведаміла "Інтэрфаксу", што, паводле адной з версій, матывам забойства "маглі стаць рэзкія выказванні палітыка з нагоды ісламу". 8 сакавіка суддзя Наталля Мушнікава пры абвяшчэнні пастановы аб арышце Дадаева заявіла, што ён прызнаўся ў датычнасці да злачынства.
Цяпер паводле справы праходзяць пяць фігурантаў. Басманны суд сталіцы даў санкцыю на іх арышт.