Рабочых і прадпрымальнікаў клічуць на Дзень Волі

• 4.03.2015, 10:47

Заяўку на правядзенне шэсця і мітынгу ў Дзень Волі 25 сакавіка аргкамітэт падасць у панядзелак.

Незалежныя прафсаюзы і індывідуальныя прадпрымальнікі запрошаныя на Дзень Волі 25 сакавіка ў Менску. Такую пастанову 3 сакавіка прыняў аргкамітэт падрыхтоўкі і правядзення Дня волі, піша belprauda.org.

Прадпрымальнікі сваім удзелам у Дні Волі змогуць выказаць свой пратэст супраць указу №222, які фактычна знішчае прадпрымальніцтва ў краіне.

«Прысутнасць вялікай колькасці людзей на Дні Волі пакажа ўладам, як людзі рэальна ставяцца да іхніх ініцыятываў, у тым ліку і ў сферы працы. Не задаволены заробкам, дзейнымі законамі - прыходзь на Дзень Волі. Вядома, калі будзе атрыманы дазвол Мінгарвыканкама», - кажа прадстаўнік руху салідарнасці «Разам» Ілля Дабратвор.

Аргкамітэт падасць заяўку на правядзенне Дня Волі ў панядзелак.

Дзень Волі адбудзецца 25 сакавіка ў Менску традыцыйным маршрутам: збор удзельнікаў акцыі запланаваны а 17-й гадзіне ля кінатэатра «Кастрычнік», адкуль дэманстранты пройдуць на Бангалор. Тут запланаваны мітынг і канцэрт беларускіх музыкаў пад лозунгам «Разам за мір і незалежнасць».