Беларусы ў чаканні чарговай дэвальвацыі

• 1.04.2015, 10:22

Больш за 81% беларусаў асцерагаюцца новай дэвальвацыі беларускага рубля ў наступныя месяцы.

Звесткі нацыянальнага апытання, праведзенага ў сакавіку, пацвердзілі выснову аб тым, што менавіта эканоміка становіцца самай сур'ёзнай праблемай для ўладаў, піша «Салiдарнасць».

Вынікі зандажу грамадскай думкі апублікаваў Незалежны інстытут сацыяльна-эканамічных і палітычных даследаванняў.

Вось як размеркаваліся адказы на пытанне аб прычынах дэвальвацыі беларускага рубля ў дачыненні да даляра на 30% у снежні-студзені:

Праз паслабленне расейскага рубля - 45%;

Праз памылковую палітыку беларускага ўраду і Нацыянальнага банка - 37.4%;

Праз актыўную скупку валюты насельніцтвам - 24.6%.

Пры гэтым звыш 81% беларусаў асцерагаюцца новай дэвальвацыі беларускага рубля ў наступныя месяцы.

За першы квартал колькасць тых, хто лічыць, што беларуская эканоміка знаходзіцца ў крызісе, павысілася з 52.3% да 67.5% . Ацэньваючы дзеянні ўрада ў яго пераадоленні, толькі 23.7% рэспандэнтаў сказалі, што ён «дзейнічаў эфектыўна, але не ў стане супрацьстаяць замежным прычынам крызісу (вайна ва Украіне, падзенне коштаў нафты і да т.п.)». Амаль 40% мяркуюць, што ўлады дзейнічаюць неэфектыўна, а спасылкі на замежныя прычыны - гэта спроба зняць з сябе адказнасць за крызіс.

Цікавае меркаванне грамадзян з нагоды поспехаў беларускай эканамічнай мадэлі:

Тлумачацца ўнутранымі прычынамі, расейская дапамога - важны, але не вызначальны фактар - 32.4%;

Калі б не расейская дапамога, ніякіх поспехаў беларускай эканомікі не было б - 35.4%;

Ніякіх поспехаў у беларускай эканомікі няма - 27%.

Сярэдняя сума даходаў (уключаючы заробкі, пенсіі, дапамогі і інш. прызаробкі), якая прыпадае на аднаго сямейніка ў мінулым месяцы, працягвала зніжацца - $288 у верасні-2014, $285 у снежні 2014, $211 у сакавіку-2015.