Мінфін пакрыўдзіўся на Moody's

• 23.04.2015, 9:12

Міністэрства фінансаў Беларусі найбліжэйшым часам унясе ва ўрад прапановы супрацоўніцтва з рэйтынгавымі агенцтвамі.

«Нягледзячы на праведзеныя ў лютым-сакавіку гэтага года сустрэчы і кансультацыі з ключавымі органамі дзяржаўнага кіравання ў рамках планавага штогадовага перагляду рэйтынгаў і пададзеныя беларускім бокам разлікі, якія пацвярджаюць поўную здольнасць эканомікі і бюджэту Беларусі выконваць свае пазыковыя абавязанні у тым ліку і ў 2015 годзе, 17 красавіка гэтага года міжнароднае рэйтынгавае агенцтва Moody`s Investors Service панізіла суверэнныя крэдытныя рэйтынгі пазыковых абавязанняў Рэспублікі Беларусь на адну прыступку да ўзроўню Саа1/В3. Прагноз рэйтынгу - негатыўны», - канстатуе Мінфін.

Пры гэтым у фінансавай установе звяртаюць увагу, што 10 красавіка міжнароднае рэйтынгавае агенцтва Standard&Poor`s пацвердзіла суверэнныя крэдытныя рэйтынгі Беларусі на ўзроўні B-/У з прагнозам «стабільны», піша БелаПАН.

«Нягледзячы на эканамічны спад і зніжэнне крэдытных рэйтынгаў у краінах - ключавых гандлёвых партнёрах, на думку Standard&Poor`s, Рэспубліка Беларусь зможа ў поўным аб'ёме ажыццявіць выплаты за абслугоўванне і пагашэнне дзяржаўнай запазычанасці ў 2015 годзе, уключаючы дэбютны выпуск еўрааблігацый у суме 1 млрд. даляраў ЗША (у канцы ліпеня гэтага года)», - паказваюць у Мінфіне.

Варта адзначыць, што сваёй апошняй пастановай Moody`s панізіла доўгатэрміновы рэйтынг дзяржаўных аблігацый Беларусі да ўзроўню Саа1 (раней - В3). Агенцтва тлумачыць гэта зніжэннем магчымасцяў краіны абслугоўваць пазыковыя абавязанні і няўстойлівасцю існуючай у краіне эканамічнай мадэлі.

Згодна з ацэнкай Moody`s дэфіцыт рахунку існых аперацый Беларусі можа скласціся на ўзроўні 7% УБП у 2015 годзе і 4,2% УБП у 2016 годзе. У той жа час, адзначаюць аналітыкі агенцтва, краіну чакаюць вялікія выплаты дзяржзапазычанасці, якія ў гэтым годзе складуць блізу 4 млрд. даляраў і захаваюцца на значным узроўні ў наступныя гады. «Нават калі Беларусі ўдасца выканаць свае абавязанні ў абслугоўванні дзяржзапазычанасці ў 2015 годзе, слабасць плацёжнага балансу краіны захаваецца», - прагназуюць аналітыкі Moody`s.

Агенцтва таксама звяртае ўвагу, што магчымасці краіны прыцягваць запазычанні сёння ніжэйшыя, чым раней. «Адна з асноўных прычын такога становішча ў тым, што Расея мае менш магчымасцяў для падтрымкі Беларусі, улічваючы, што сама перажывае значны эканамічны спад», - канстатуюць аналітыкі Moody`s.

Пры гэтым імавернасць новай праграмы з Міжнародным валютным фондам аналітыкам агенцтва прадстаўляецца ў найбліжэйшай будучыні малаімавернай, паколькі Беларусь наўрад ці пойдзе ў 2015 годзе на структурныя рэформы ў эканоміцы, на якіх настойвае фонд.

Разам з гэтым Moody`s выказвае асцярогі з нагоды ўстойлівасці беларускай эканамічнай мадэлі. «Устойлівасць эканамічнай мадэлі Беларусі з'яўляецца нявызначанай, паколькі застаецца вельмі адчувальнай да эканамічных шокаў», - гаворыцца ў абгрунтаванні агенцтва да прынятай рэйтынгавай пастановы. На думку аналітыкаў Moody`s, без сур'ёзных структурных рэформаў у эканоміцы Беларусь «будзе па-ранейшаму залежаць ад замежнага фінансавання».

У канцы лютага Moody`s Investors Service абвясціла аб пастаноўцы рэйтынгу Рэспублікі Беларусь (В3/ прагноз «негатыўны») і еўрааблігацый на перагляд з магчымасцю паніжэння. Свае дзеянні Moody`s звязвала з паслабленнем нацыянальнай валюты і павышэннем рызыкі зніжэння тэмпаў эканамічнага росту.

Пастанову агенцтва тады таксама пракаментавала Міністэрства фінансаў Беларусі: «Гэтая пастанова, на наш погляд, прынятая без ўсебаковага аналізу сітуацыі ў эканоміцы Рэспублікі Беларусь».