МЗС Украіны: Санкцыі ЕЗ супраць Расеі могуць быць узмоцненыя 19 чэрвеня

• 24.04.2015, 9:11

Санкцыі Еўрапейскага Звязу супраць Расеі могуць быць узмоцнены, калі яна не будзе выконваць Менскія пагадненні.

Пра гэта заявіў міністр замежных спраў Украіны Павел Клімкін у эфіры тэлеканала 1 + 1 у праграме «Права на ўладу», піша УНИАН.

Кіраўнік установы, кажучы пра візіт прэзідэнта Пятра Парашэнкі ў Францыю адзначыў, што сустрэча з Франсуа Аландам была важнай у плане вядзення далейшых мерапрыемстваў.

«У кантэксце таго, што ў пачатку чэрвеня «Вялікая сямёрка» сустрэнецца ў Нямеччыне, калі будуць вызначацца вынікі Менску, і стратэгічныя крокі, і калі потым 19 чэрвеня, будзе вызначацца, які будзе лёс санкцый, ці будуць яны надалей дзейнічаць, або калі Расею прызнаюць стараной, якая не выконвае Менскія дамоўленасці, стануць больш жорсткімі», - падкрэсліў Клімкін.

Разам з тым ён адзначыў, што прэзідэнты Украіны і Францыі падчас сваёй размовы засяроджваліся на крытычна важных пунктах.

Так, з ягоных слоў, бакі разумеюць, што «няма з боку Данецка і Луганска рэальнага спынення агню», а таксама, што «яны не дазваляюць кантраляваць месца, дзе павінна знаходзіцца адведзеная цяжкая артылерыя».

Акрамя таго, міністр распавёў, што было абмеркаванае пытанне вызвалення закладнікаў і якім чынам ціснуць на Расею, якая можна весці захады для вызвалення палонных, і якім чынам дапусціць украінскую гуманітарную дапамогу на акупаваныя тэрыторыі да мірных грамадзян, а таксама пытанні правядзення мясцовых выбараў на Данбасе.

Нагадаем, Расея ў сакавіку 2014 года пасля ўводу войскаў анэксавала ўкраінскі Крым і пачала дэстабілізаваць абстаноўку на Данбасе. Пры непасрэдным удзеле расейскіх спецслужбаў і падтрымцы расейскага войска на Данбасе былі створаныя так званыя Данецкая і Луганская «народныя рэспублікі». РФ пастаўляе тэрарыстам зброю і накіроўвае на Данбас наймітаў і свае рэгулярныя войскі.

Праз гэтыя дзеянні ЗША, Еўразвяз, Канада, Японія, Аўстралія і многія іншыя краіны ўвялі санкцыі супраць Расеі.