Міліцыя пачала шукаць «дармаедаў»?

• 7.04.2015, 21:51

У Бярозе шукаюць «дармаедаў» на вуліцах у працоўны час.

У Бярозе супрацоўнікі міліцыі спыняюць у працоўны час на вуліцах людзей працаздольнага веку і пад выглядам пошуку сэксуальнага маньяка перапісваюць звесткі, паведамляе «Радыё Рацыя».

Беспрацоўны сябра Кансэрватыўна-Хрысціянскай партыі БНФ Андрэй Кавалевіч мяркуе, што такім чынам ужо фармуюць спісы так званых «дармаедаў».

- І цяпер адпаведна міліцыя спыняе людзей на вуліцах, потым перапісвае звесткі, дасылае позвы, каб прыходзілі ў раённы аддзел унутраных спраў і каб паведамлялі пра сваё месца працы. Прыкрываюцца пошукамі нейкага маньяка, хутчэй гэта ідзе пошук кандыдатаў на выплату гэтай сумы, так, як было са мной.

Нагадаем, 2 красавіка Лукашэнка падпісаў дэкрэт аб «дармаедах». Беспрацоўныя цяпер будуць выплачваць збор у суме 20 базавых адзінак, за нявыплату збору прадугледжаны штраф ад двух да чатырох базавых адзінак або адміністрацыйны арышт.