Мікалай Аўтуховіч: У «выбары» я гуляць не хачу і ўладам падыгрываць не буду
- 20.07.2015, 14:44
Удзельнічаць у «выбарах» пасля адмовы ў рэгістрацыі ініцыятыўнай групы Мікалая Статкевіча нельга.
Пра гэта charter97.org заявіў былы палітвязень, прадпрымальнік, афіцэр Мікалай Аўтуховіч.
- Я і не разлічваў, што яго зарэгіструюць. У выбары я гуляць не хачу і падыгрываць ім не буду. Нават калі б Мікалая Статкевіча зарэгістравалі, я б з гэтай кампаніі ўсё роўна выйшаў, - сказаў ён.
- Што рабіць далей прыхільнікам апазіцыі?
- Пытанне, вядома, цікавае. Не хацелася б агучваць свае думкі, бо прыйдуць і заломяць рукі. Але наогул...тут застаецца толькі чакаць. Таму што цяпер усё наядуцца «выбараў», усе зразумеюць, што на іх не трэба было хадзіць і ўжо пасля «выбараў» усё задумаюцца, а што ж рабіць далей. Тады трэба будзе садзіцца за стол і ўсе разам будзем думаць, што і як рабіць цяпер. Плюс сітуацыя як раз адпаведная, бо пасля выбараў, натуральна, мы адчуем, як будзе абвальвацца наш рубель, як людзі будуць бяднець і на фоне гэтага, можа, у людзей і саспее які-небудзь добры план з улікам сітуацыі. Але ў кожным выпадку на гэты спектакль пад назвай «выбары» хадзіць не трэба. Я ўжо казаў гэта не адзін раз: мы ўжо на дзесяць «выбараў» наперад ведаем, хто будзе «прэзідэнтам» у гэтых варунках.
Нагадаем, у ініцыятыўную групу для вылучэння Мікалая Статкевіча кандыдатам у прэзідэнты ўвайшло больш за 1500 чалавек. Сярод іх - вядомыя беларусы Зінаіда Бандарэнка, Павел Севярынец, Аляксей Марачкін, Уладзімір Халіп, Мікалай Аўтуховіч, Славамір Адамовіч, Лявон Вольскі, Аляксандр Тамковіч, Вячаслаў Сіўчык, Сяргей Законнікаў, Юры Хашчавацкі, Зміцер Дашкевіч, Вольга Завадская.
Дакументы на рэгістрацыю ініцыятыўнай групы былі пададзеныя ў ЦВК 16 ліпеня, кіраўніцай групы была заяўленая Марына Адамовіч - жонка палітыка.
Раней старшыня Цэнтрвыбаркама Беларусі Лідзія Ярмошына назвала немагчымай рэгістрацыю Мікалая Статкевіча ў якасці кандыдата на чарговых выбарах прэзідэнта. «Пакуль ён асуджаны, мы не маем юрыдычнага права аформіць яго як кандыдата ў прэзідэнты. Больш за тое, мы не маем права зарэгістраваць ягоную ініцыятыўную групу. А калі не будзе зарэгістраваная ініцыятыўная група, хто ж тады будзе збіраць подпісы ў ягоную падтрымку? Такія акцыі, калі яны і будуць праходзіць, адразу становяцца нелегітымнымі», - сказала Ярмошына.