Мігранты каля вакзала ў Будапешце пратэстуюць другі дзень

• 2.09.2015, 21:01

Амаль дзве тысячы чалавек правялі мінулую ноч на Будапешцкім вакзале Келеці.

Сотні нелегальных мігрантаў далей пратэстуюць супраць пастановы Вугоршчыны забараніць ім пасадку ў цягнікі, на якіх яны маглі б адправіцца ў Нямеччыну ды іншыя заходнееўрапейскія краіны, дзе яны разлічваюць атрымаць прытулак, паведамляе расейская служба BBC.

Адправіцца ў падарожжа яны не могуць, нават нягледзячы на ўжо набытыя квіткі.

Мігранты купілі квіткі пасля таго, як у панядзелак Вугоршчына адмовілася рэгістраваць усіх новапрыбылых і дазволіла частцы з іх сесці на цягнікі да аўстрыйскай сталіцы і гарадоў на поўдні Нямеччыны.

Вугорскія ўлады тлумачаць свае дзеянні імкненнем выконваць абавязанні аб ахове дзяржаўных межаў.

Засмучаныя і раззлаваныя

У сераду раніцай сотні мігрантаў працягнулі пратэсты супраць пастанову вугорскіх уладаў. Яны скандавалі "Свабода, свабода!" і паказвалі набытыя квіткі. Акрамя таго, яны сцвярджаюць, што патрацілі сотні еўраў на праязныя дакументы, якімі ім цяпер не даюць скарыстацца.

Са слоў карэспандэнта BBC Ніка Торпа, які знаходзіцца на месцы падзей, напружанне паміж нелегальнымі мігрантамі і атрадамі паліцыі прыкметна нарастае.

"Многія мігранты спрабуюць зразумець, што ім цяпер рабіць. Усе задаюць адное і тое ж пытанне: ці дазволяць ім скарыстацца квітком, або яны будуць вымушаныя знаходзіцца ў Будапешце, пакуль у іх не скончацца грошы? Супрацоўнікі паліцыі цяпер блакуюць уваход на станцыю. Людзі вельмі раззлаваныя і засмучаныя", - распавёў Торпа.

Чакаецца, што прэм'ер-міністр Вугоршчыны Віктар Орбан у чацвер абмяркуе сітуацыю са сваімі еўрапейскімі калегамі.

Згодна з дублінскай дамовай, падпісанай усімі краінамі Еўразвязу, уцекачы абавязаныя звяртацца з просьбай аб прытулак у першай жа краіне ЕЗ, у якой яны апынуліся.

Аднак схема, паспяхова працавала на працягу многіх гадоў, сталася вельмі неэфектыўнай, калі Еўразвяз сутыкнуўся з найбуйнейшым наплывам просьбітаў прытулку з часу заканчэння Другой сусветнай вайны.

Лік нелегальных мігрантаў, якія ўязджаюць у Еўропу ўжо дасягнула рэкорднага ўзроўню, - толькі ў ліпені ў краіны ЕЗ заехалі 107 500 чалавек. Нямеччына плануе прыняць у гэтым годзе не менш за 800 тысяч мігрантаў, гэта значыць у чатыры разы больш, чым звычайна.

Праблема ў тым, што большасць мігрантаў, якія пакідаюць Сірыю ды іншыя краіны Блізкага Усходу, трапляюць у Еўразвяз праз Вугоршчыну, Італію і Грэцыю. Гэтыя тры краіны не спраўляюцца з наплывам уцекачоў і не могуць зарэгістраваць усіх.

У сувязі з крызісам Нямеччына вырашыла часова прыпыніць дзеянне Дублінскага пагаднення і паабяцала таксама разглядаць заявы аб выдачы прытулку, незалежна ад таго, праз якую краіну прыбылі перасяленцы.

Тым часам, больш за чатыры тысячы мігрантаў прыбылі сёння ўночы на мацерыковую Грэцыю з выспы Лесбас. Усяго, паводле звестак еўрапейскага памежнага агенцтва Frontex, за апошні тыдзень у Грэцыю заехалі 23 тысячы нелегалаў - гэта на 50% больш, чым за тыдзень да гэтага.