На «Беларуськаліі» зноў загінуў рабочы

• 26.10.2016, 14:40

Пры будаўніцтве новага склада замест згарэлага звалілася з вялікай вышыні люлька з пяццю працоўнымі.

Пра гэта сайту charter97.org паведаміла знаёмая з сітуацыяй крыніца.

«На 1-й рудаўправе ААТ «Беларуськалій» загінуў рабочы ГА «Пасат». Яшчэ двое знаходзяцца ў рэанімацыі.

Цяпер там ідзе будаўніцтва «ўдарнымі тэмпамі» новага склада (стары склад згарэў яшчэ ў траўні), рабочыя працуюць у тры змены.

Падчас работ абарваўся трос, люлька ўпала з вялікай вышыні, там знаходзілася пяць чалавек. Працы на гэты момант спыненыя, на месцы працуе следчая група», - гаворыцца ў паведамленні.

У даведачнай службе ААТ «Беларуськалій» каментаваць сітуацыю адмовіліся.

У прыёмнай ГА «Пасат» журналістам charter97.org паведамілі: «Без каментароў, вядзецца спецрасследаванне».

Нагадаем, што апошні трагічны выпадак на ААТ «Беларуськалій» адбыўся 12 ліпеня. Тады пры выкананні свідравальных работ загінуў 53-гадовы машыніст горназдабыўной машыны.