Качанава: Грошай для настаўнікаў няма, хай выконваюць «дадатковыя паслугі»

• 30.08.2016, 14:41

Павысіць аклады настаўнікам урад не можа нават напярэдадні «выбараў».

Віцэ-прэм'ер Наталля Качанава заявіла, што ўрад працуе над выкананнем даручэння Лукашэнкі забяспечыць настаўнікам годны заробак. Праўда, развязаць гэтую задачу віцэ-прэм'ер прапаноўвае за кошт саміх настаўнікаў.

«Паабяцаць, што мы цяпер возьмем і павысім аклады, я не магу», - сказала журналістам віцэ-прэм'ер Наталля Качанава. Яна дадала, што сур'ёзных рэформаў не будзе, паведамляе tut.by.

- Мы хочам задаволіць жаданне настаўнікаў зарабляць ад пазабюджэтнай дзейнасці і надаваць дадатковыя паслугі. Гэта не запатрабуе бюджэтных выдаткаў, але дазволіць атрымліваць педагогам пэўныя дывідэнды, - распавяла пра адну з ініцыятыў Наталля Качанава.

Выяўляецца, цяпер педагогам нявыгадна працаваць звышурочна і даваць дадатковыя ўрокі - даплаты мінімальныя.

- Я неяк у суботу зайшла ў адну з менскіх школ і ўбачыла там вялікую колькасць маленькіх дзяцей. Выявілася, што бацькі з двух гадоў водзяць іх сюды на заняткі для падрыхтоўкі ў школу. Але вядзе гэтыя ўрокі індывідуальны прадпрымальнік. Ва ўстанове адукацыі ён проста арандуе памяшканні, - распавяла віцэ-прэм'ер. - Гэта нядрэнна, што ёсць прыватныя ўрокі, але і настаўнікі гэтай жа школы маглі б весці такія падрыхтоўчыя заняткі, каб дадаткова зарабіць. Мы хочам зрабіць так, каб настаўніку гэта было выгадна.

Яшчэ адна з ініцыятыў тычыцца дадатковых даплат педагогам, якія пасля размеркавання не сышлі з сістэмы адукацыі. Але, з усяго відаць, гэтая ініцыятыва застанецца на ўзроўні ідэі: Качанава палічыла яе «эканамічна неабгрунтаванай».

- Ёсць прапанова павялічыць даплаты настаўнікам з другога да трэцяга года працы. Але тут трэба ўсё пралічыць і эканамічна выверыць, - сказала віцэ-прэм'ер.