Зміцер Бандарэнка: «Абранне» Канапацкай падпадае пад артыкул 357 КК РБ
- 12.09.2016, 11:16
Ці стануць кіраўнікі АГП такімі ж ашуканцамі, як Ярмошына?
Каардынатар грамадзянскай кампаніі «Еўрапейская Беларусь», былы палітвязень Зміцер Бандарэнка пракаментаваў charter97.org вынікі «парламенцкіх выбараў».
- Галоўнай інтрыгай 11 верасня стала пастанова Лукашэнкі прызначыць у «палату» прадстаўніцу АГП Ганну Канапацкую. Пра тое, што гэта менавіта прызначэнне, сведчыць заява карэспандэнта «Нашай Нiвы», які зафіксаваў павелічэнне прыходу на 205-м выбарчым участку 97-га Кастрычніцкай акругі, дзе абіралася Канапацкая, з 25 да 51%, а таксама заяву чальца АГП Віктара Карнеенкі, аднаго з кіраўнікоў кампаніі ў незалежным назіранні за «выбарамі» аб тым, што сумленнага падліку галасоў на двух участках гэтай жа акругі не было.
Замілоўваюць заявы старшыні АГП Лябедзькі, што партыя, хутчэй за ўсё, пакіне Канапацкую дэпутатам. У маральным плане такая пастанова робіць Лябедзьку, Багданкевіча і іншых кіраўнікоў партыі такімі ж ашуканцамі, як Лукашэнка і Ярмошына. Аднак насамрэч гаворка ідзе пра саўдзел у крымінальным злачынстве, бо чамусьці нехта з чальцоў 205-й участковай камісіі для павелічэння прыходу ўкінуў больш за 600 выбарчых бюлетэняў, якія прынеслі «перамогу» Канапацкай. Гэта пастанова можа адпавядаць 357 артыкулу Крымінальнага кодэксу РБ «змова з мэтаю ўтрымання ўлады неканстытуцыйным шляхам». А тое, што з'яўленне апазіцыянера ў псеўдапарламенце дапамагае Лукашэнку ўтрымаць уладу, сумневаў няма.
Нездарма Лідзія Ярмошына асаблівую ўвагу на сваёй прэс-канферэнцыі пасля «выбараў» надала траплянню апазіцыянеркі Канапацкай у «палату прадстаўнікоў».
Канапацкая - юрыстка і павінна выдатна разумець, што новая дэмакратычная ўлада ў Беларусі будзе расцэньваць тое, што адбылося менавіта ў адпаведнасці з гэтым артыкулам Крымінальнага кодэкса, - сказаў Бандарэнка.