Чыноўнікі ЖКГ расказалі пра новыя «сюрпрызы» для беларусаў
- 19.03.2017, 12:59
Камунальнікі маюць намер прымусіць грамадзян яшчэ больш эканоміць на цяпле і электрычнасці.
Чыноўнікі распавялі kp.by як у Беларусі будуць эканоміць электрычнасць і цяпло ў дамах.
- Спажыванне цеплаэнэргіі на душу насельніцтва ў 2016 годзе было 2,3 Гкал, хоць у 2010-м - 2,5 Гкал. Гэтыя вынікі дасягнуты як сістэмай ЖКГ, так і пры дапамозе самога насельніцтва, таму што яно пачало эканоміць, - сказаў Міхаіл Малашэнка.
У планах камунальнікаў - эканоміць яшчэ больш, бо ў Беларусі большасць дамоў не адпавядаюць нормам энергаэфектыўнасці, расход цяпла ў іх перавышае сучасныя стандарты ў тры-чатыры, а то і пяць разоў.
Самы эфектыўны спосаб эканоміць цяпло для тых, чые дамы пабудаваныя 30 - 40 гадоў таму, - уцяпліць сцены і памяняць старыя вокны на новыя. Бо блізу 95% кватэр - уласнасць насельніцтва, то аплаціць выдаткі павінны самі жыхары. Праўда, як абяцаюць чыноўнікі, з падтрымкай дзяржавы, для гэтага абяцаюць стварыць спецыяльны фонд.
Сёлета ва ўсіх шматкватэрных дамах Беларусі ўсталююць «аўтаматызаваныя сістэмы рэгулявання расходу цяпла», або, прасцей кажучы, аўтаматы, якія будуць змяняць тэмпературу ў кватэрах у залежнасці ад надвор'я на вуліцы.
- Цяпер блізу 94% жылфонду, абсталяваныя такімі сістэмамі. У 2017 годзе плануем завяршыць работу ў абсталяванні ўсяго жылля, - распавёў Генадзь Аксціловіч. - З 27 тысяч дамоў, у якіх ёсць магчымасць усталяваць абсталяванне, яно ёсць у 25,5 тысячы. Тыя, што засталіся жылыя дамы, як правіла, малапавярховая забудова. Ёсць тэхнічныя пытанні, але яны развязваюцца.
А вось кватэрнымі лічыльнікамі для ўліку цяпла абсталявана ўсяго блізу 10% дамоў, хоць яны дапамагаюць зэканоміць да 10 - 15% цеплавой энэргіі. Спецыялісты тлумачаць, што ў дамах з вертыкальнай разводкай труб іх вельмі складана ўсталяваць. Але тыя, хто хоча эканоміць на апале, могуць паставіць сабе лічыльнікі і рэгулятары цяпла. Напрыклад, для сярэднестатыстычнай двухпакаёвай кватэры з вертыкальнай разводкай гэта каштуе 210 рублёў. Нятанна, затое можна будзе рэгуляваць тэмпературу паветра ў кватэры.
Зніжаць збіраюцца спажыванне не толькі цяпла, але і электрычнасці. Сёння за асвятленне пад'ездаў і працу ліфтаў плацяць жыхары, таму ў пад'ездах працягнуць усталёўваць свяцільні, якія ўключаюцца, калі хтосьці заходзіць. І мяняць старыя лямпачкі напальвання на святлодыёдныя, якія спажываюць значна менш электрычнасці.