МВФ прыпыніў перамовы з Лукашэнкам

• 20.07.2017, 17:50

МВФ не бачыць «выразнай падтрымкі рэформаў».

Міжнародны валютны фонд прыпыніў дыскусіі з Беларуссю «ў чаканні выразнай дэманстрацыі падтрымкі на высокім узроўні патрэбных змен», заявіў, адказваючы на пытанне tut.by на брыфінгу ў Вашынгтоне афіцыйны прадстаўнік МВФ Вільям Мюрэй.

Гаворка ідзе найперш пра тое, што тычыцца дзяржаўных прадпрыемстваў і камунальнага сектара, адзначыў прадстаўнік МВФ.

Найбліжэйшыя кантакты прадстаўнікоў МВФ і Беларусі чакаюцца ўжо не ў рамках падрыхтоўкі праграмы, а ў ходзе штогадовай місіі МВФ паводле артыкула IV, які чакаецца ў кастрычніку.

Як раней паведамлялася, прадстаўнічыя дэлегацыі МВФ ужо двойчы былі ў Менску ў гэтым годзе. 16 сакавіка на запрашэнне Лукашэнкі Менск наведалі кіраўнік місіі МВФ аб Беларусі Пітэр Долман, намеснік кіраўніка Еўрапейскага кіравання МВФ Танас Арваніціс і старэйшы рэгіянальны прадстаўнік МВФ у рэгіёне СНД Бас Бакер. Аляксандр Лукашэнка сказаў, што запрасіў прадстаўнікоў МВФ, каб абмеркаваць «даслоўна 1-2 пытанні», якія «для мяне і краіны вельмі важныя». Са слоў прадстаўніка МВФ, адным з пытанняў абмеркавання момантаў была эканамічная і сацыяльная сітуацыя, таксама абмяркоўвалася сістэма сацыяльнай абароны для тых, хто больш за ўсё ў ёй мае патрэбу.

Ужо ў пачатку года практычна была гатовая да падпісання праграма Беларусі з МВФ, якая падтрымлівалася б крэдытам на суму не менш за 3 млрд даляраў на дзесяць гадоў пад 2,28% гадавых. Крэдыторы патрабавалі лібералізацыі беларускай эканомікі, ліквідацыі перакрыжаванага субсідавання. Як у лютым адзначаў першы віцэ-прэм'ер Васіль Мацюшэўскі, заставалася прыняць палітычную пастанову.