Лукашэнка: Няма месца, дзе можна схавацца
- 24.04.2018, 11:19
Дыктатар выступіў з «пасланнем да народа і парламента».
Сёння Лукашэнка выступіў з так званым «пасланнем да народа і парламента». Выступ пачаўся ў «авальнай зале» дома ўрада а 10.30 і доўжыўся 1 гадзіну і 20 хвілін. Пытанні «палатачнікаў» дыктатару не трансляваліся.
Жывую трансляцыю выступу праводзіў канал «Беларусь 1».
Няма дзе схавацца
«На планеце больш няма месца, дзе можна схавацца, адгарадзіцца і бясстрасна назіраць за тым, што адбываецца, — заявіў Лукашэнка. — Бяспека стала адчувальнай з'явай. Сёння асабліва востра адчуваецца, як лёгка яе страціць і якіх неймаверных намаганняў каштуе яе захаваць».
Трэба ўцякаць
Дыктатар заявіў, што па грошы да дзяржавы звяртаюцца ўсе – і дзяржпрадпрыемствы, і прыватнікі. «Да апекі дзяржавы многія настолькі прывыклі, што пры першых прыкметах праблем ідуць па дапамогу ў бюджэт. Гэта тычыцца ў роўнай ступені і дзяржаўных, і прыватных прадпрыемстваў. Ад такой практыкі пара не сыходзіць, а ўцякаць», - сказаў Лукашэнка. Дыктатар таксама заявіў, што сам не можа зразумець, хто кіруе прадпрыемствамі – ці дырэктары, ці чыноўнікі розных рангаў.
Лёгка не будзе
Пачатак выступу дыктатара дастаткова апакаліптычны.
«Лёгкага часу не будзе. Санкцыйныя войны рыкашэтам усё адно закрануць нас. Але замыкацца ў сабе мы не будзем», - сказаў Лукашэнка.
Будзе як у Арменіі
«Пытанне магчымай карэкціроўкі Канстытуцыі абмяркоўваецца ў інтэрнэце ўвесь час. Раз і назаўжды хачу сказаць, асабліва для абураных СМІ з-за бугра: я ніколі не дзейнічаў несумленна ў стаўленні да людзей. Я абяцаў і ніколі не парушу сваю прысягу, бо будзе як учора ў Арменіі. З народам гуляцца нельга. Калі будзе рэферэндум, то я скажу загадзя, пра гэта даведаецеся з СМІ. Я асабіста ні аб якім рэферэндуме не думаў. Нам цяпер не да рэферэндумаў», - заявіў Лукашэнка.
«Калі хто-небудзь думае, што мы зменім Канстытуцыю і тым самым створым падмуркі для нашых Майданаў і «майданутых», то гэтага не будзе», - дадаў дыктатар.
«Не трэба ламаць Канстытуцыю краіны пад аднаго чалавека. А раптам потым гэты чалавек зламаецца? Арменія - таму прыклад», - дыктатар зноў успомніў аб перамозе рэвалюцыі ў Арменіі. Відаць, гэтая тэма не дае яму спакою.
«Раней мы папракалі амерыканцаў, што яны распальваюць агонь вайны, а цяпер і самі туды скаціліся. Я, як чалавек, гляджу на працу СМІ – некаторыя гатовыя закасаць рукавы, узяць гранатамёты і кулямёты і пачаць вайну.
Я адразу кажу «падпальшчыкам»: не дай Бог, штосьці здарыцца – і першыя, хто падпальвае, са сваімі дзецьмі апынуцца там. Яны першыя будуць адпраўленыя тушыць разам са сваімі дзецьмі тое, што падпальвалі. Таму, перш чым распальваць абстаноўку – падумайце», - заявіў дыктатар.
Не можам разабрацца – што там за БНР была
«Мы не можам разабрацца з гісторыяй. Што за БНР такая, куды нашы інтэгратары, нацыяналісты «рухаліся». Ліміт рэвалюцый і войнаў мы вычарпалі – годзе. Я цяпер толькі па-крупняку кажу.
Была Айчынная вайна 1812 года. Захацелася тут пабадзяцца Напалеону са сваёй ардой. Потым рэвалюцыя, потым БНР, з якой дагэтуль не можам разабрацца», - заявіў дыктатар.
Як быццам мы ведаем, хто там «рыпіць»?
Дыктатар паразважаў аб міжнароднай абстаноўцы.
«Сыдзіце з Сірыі ўсе, дайце сірыйскаму народу самому абіраць сваю будучыню. Спыніце выкарыстоўваць Сірыю як палігон для супрацьстаяння. Або вось у мяне пытаецца ў Малдове, напэўна, празаходняя журналістка – што вы думаеце пра справу Скрыпаля? Як быццам мы ведаем, хто і як там «рыпіць», - сказаў дыктатар.
Правераныя людзі з аўтаматамі
Лукашэнка прыстрашыў Дзяржаўную інспекцыю ў ахове жывёльнага і расліннага свету разабрацца з парушэннямі закона метадамі 90-х гадоў.
Лукашэнка недвухсэнсоўна намякнуў, што ў сярэдзіне 1990-х дасылаў «правераных людзей з аўтаматамі», якія «перастралялі ўсіх бандытаў» на трасе Берлін-Масква.
«Адзін выпадак адбыўся. Мне аператыўнікі далажылі, як жарт пераслалі праваахоўныя органы. Ну проста ганьба. Загружаюць фуру гэтай рыбай, ужо, напэўна, напалову здохлай, і вязуць у Менск і па адрасах развозяць. Адрасы мне на стол паклалі. І адкуль інфармацыя пайшла? Звычайны кіроўца, які гэта вёз. Суцэльнае брыдкаслоўе, кажа, ды колькі можна, у мяне ўжо аўтамабіль, кажа, растапырыўся, развальваецца ад гэтага грузу, я яе не магу давезці, я ўжо забыўся, калі спаў. Амаль працытаваў цалкам», — прывёў падрабязнасці Лукашэнка.
«Вы што, з розуму там з'ехалі? — прадоўжыў ён. — Ці мне ўжываць жорсткія захады, як у першыя гады свайго жыцця прэзідэнцкага, калі забівалі людзей на трасе Масква—Берлін? Калі я пасылаў жменьку надзейных людзей з аўтаматамі, якія перастралялі там палову і навялі парадак цягам месяца?»
«Нас па адным пераб'юць»
«Планету захліснулі гандлёвыя войны», — заявіў Лукашэнка – «Ды і ў нас далёка па прыклады хадзіць не трэба. Вазьміце хоць бы малочныя, мясныя баталіі, цукровыя, якія ладзіць наш найбліжэйшы партнёр, блакуючы доступ натуральным беларускім прадуктам на свой рынак. Навошта з Новай Зеландыі было весці сухое малако? Калі побач у Беларусі яго дзяваць няма куды? Вось праз такія сутыкненні мы губляем адзін аднаго.
Нас па адным пераб'юць. Па адным павыбіваюць, выкінуць з ЭАЭС - як два гады таму, калі ўрад Арменіі падвысіў кошты расейскага прыроднага газу, а потым вымушаны быў адступіць», - дыктатар зноў звярнуўся да армянскай тэматыкі.
Гандаль і «пракладкі»
Дыктатар назваў пасярэдніцкія гандлёвыя арганізацыі «пракладкамі» і запатрабаваў іх забараніць.
«Адна з праблем беларускай эканомікі, якая патрабуе аператыўнага развязання, — пасярэдніцкія структуры», - заявіў Лукашэнка.
«Там, дзе доля дзяржаўнага сектара высокая, яны прыносяць больш шкоды, чым карысці. Ды і не толькі дзяржаўны сектар. Што мы ўсё аб дзяржаўным ды аб дзяржаўным?», — сказаў Лукашэнка.
«Разбярыцеся з гэтымі пасярэднікамі. Гэта пытанне для мяне балючае і вельмі важнае. Яны ж усякімі праўдамі гэтыя праслойкі і няпраўдамі, хабарамі ў тым ліку, збываюць на прадпрыемства свае тавары і часта завышаным коштам. Пасярэднікі з'ядаюць да 3% ВУП, гэта ўрад палічыў», - дыктатар знайшоў «вінаватых» у гаротным стане эканомікі.
«Усе вакол – жулікі і злодзеі»
Лукашэнка заявіў, што гатовы адправіць у адстаўку міністра транспарту і камунікацый Анатоля Сівака.
«У сістэме Мінтранса ўсё часцей узнікаюць пытанні карупцыйных праяў, — заявіў дыктатар. — Неабходна самым кардынальным чынам навесці там парадак, прычым раз і назаўжды. Я шчыра скажу, што ўжо блізкі да таго, каб Сівака адправіць туды ж, куды міністра лясной гаспадаркі. І шчыра кажу, што ваша міністэрства самым жорсткім чынам знаходзіцца ў цэнтры ўвагі праваахоўнай сістэмы агулам. Дзейнічайце!»
«У простага чалавека нават можа скласціся ўражанне, быццам усе вакол жулікі і злодзеі», — заявіў Лукашэнка.