Іран перакідае войскі ва Усходні Азербайджан

• 26.10.2020, 12:11

Вучэнні праходзяць пад кодавай назвай «Улюбёныя ў вілаят-99».

Іранскія вайскоўцы пачалі вучэнні на поўначы краіны для праверкі боегатоўнасці войска і Корпуса вартавых ісламскай рэвалюцыі - у рэгіён плануецца перакінуць цяжкую тэхніку. Вучэнні праходзяць на фоне прадаўжэння канфлікту ў Нагорным Карабаху, піша defence24.pl.

Мерапрыемства пад кодавай назвай «Улюбёныя ў вілаят-99» (Lovers of Velayat-99) запланаванае ля паўночна-заходняй памежнай тэрыторыі Ірана, уключаючы рэгіён Усходні Азербайджан. Падчас вучэння планавалася хуткая перакідка да краіны пяхотных і інжынерных частак пры падтрымцы артылерыйскіх сістэм і беспілотнікаў.

Іранскія СМІ, звяртае ўвагу defence24.pl, упарта ўхіляюцца ад увязкі распачатых вучэнняў з закалотамі ў Нагорным Карабаху, якія паднялі градус ваеннай напружанасці ў рэгіёне. Асноўным матывам мерапрыемства называюць неабходнасць падвышэння боегатоўнасці войскаў і праверкі тэхнікі - ва ўмовах эмбарга яна практычна цалкам стваралася сіламі іранскай прамысловасці.

Акрамя войска, ва Усходні Азербайджан перакідваюцца падраздзяленні КВІР. Так, ужо вядома аб тым, што на поўнач Ірана адправілася элітная брыгада наземных войскаў Корпуса «Імам Заман». Дыслацыравацца вартавым ісламскай рэвалюцыі трэба будзе ля гарадоў Хамарлу і Джульфа.

Раней Іран правёў вайсковыя вучэнні «Абаронцы неба вілаята-99», падчас якіх у баявую гатоўнасць прыводзілася СПА іранскага войска і КВІР прыкладна на палове тэрыторыі краіны. Мэтай мерапрыемства была адпрацоўка ўзаемадзеяння сродкаў СПА і СРА розных тыпаў, дыслакаваных на іранскай тэрыторыі.