Вызвалены палітвязень Віталь Шкляроў ужо знаходзіцца ў ЗША

• 28.10.2020, 12:36

Ён знаходзіцца ў шпіталі.

Вызвалены палітвязень, паліттэхнолаг Віталь Шкляроў ужо вярнуўся ў ЗША, цяпер ён у Вашынгтоне, паведамляе «Радыё Свабода». Ён знаходзіцца ў кардыялагічным аддзяленні шпіталя.

Хто такі Віталь Шкляроў

Віталь Шкляроў быў фігурантам «справы Ціханоўскага», хоць яшчэ да затрымання заяўляў, што не быў кансультантам Сяргея Ціханоўскага і ніколі на яго не працаваў.

«Следства не закончанае, крымінальная справа не скончаная. Мы напісалі хадайніцтва аб дазволе на выезд, яго задаволілі, таму Віталь з'ехаў адразу да сям'і і паправіць сваё здароўе пасля перанесенага каранавіруса», - паведаміў агенцтву «Інтэрфакс» адвакат Шклярава Антон Гашынскі ў аўторак.

Гашынскі падкрэсліў, што атрыманы дазвол на выезд.

«Гэта, безумоўна, вынік званка Пампэа. Менавіта вызваленне Віталя было асноўнай мэтай і прычынай званка», - падкрэсліў ён.

Ураджэнец Гомеля пазіцыянуе сябе як амерыканскі, нямецкі і расейскі палітычны кансультант, дарадца выбарчых кампаній Барака Абамы, Берні Сандэрса, Ангелы Мэркель, Ксеніі Сабчак ды іншых.

Жонка Шклярава - грамадзянка ЗША, яна працуе ў пасольстве ў Кіеве. У сувязі з гэтым ён мае амерыканскі дыпламатычны пашпарт.