Кошт нафты Brent упаў ніжэй за $38 упершыню за чатыры месяцы

• 29.10.2020, 16:29

Нафтавыя катыроўкі падаюць другі дзень запар.

Кошт снежаньскага ф'ючэрса нафты маркі Brent знізіўся на таргах у чацвер на 3,11%, да $37,84 на 13:05 паводле Кіева. У папярэдні раз кошт апускаўся ніжэй за адзнаку ў $38 за барэль 15 чэрвеня. Пра гэта піша liga.net.

Ф'ючэрс нафты WTI з пастаўкай у снежні зніжаўся на момант напісання нататкі на 3,53% - да $36,07.

Як адзначае выданне, нафтавыя катыроўкі падаюць другі дзень запар праз рызыку COVID-19 і нявызначанасць, звязаную з выбарамі ў ЗША.

Негатыўна на рынак уплываюць таксама і іншыя фактары - рост запасаў сыравіны ў ЗША, які апынуўся мацнейшым за прагнозы, асцярогі з нагоды лішку прапановы і паслаблення попыту на паліва і чаканае аднаўленне нафтаздабычы ў Лівіі да 500 000 барэляў у дзень пасля доўгага перыяду прыпынення вытворчасці.