ДПК: Беларусь часова абмяжоўвае ўезд з Латвіі, Літвы, Польшчы і Украіны

• 29.10.2020, 19:15

Афіцыйны каментар Дзяржпамежкамітэта.

ДПК афіцыйна паведаміў «аб часовых абмежаваннях у пунктах пропуску».

«У сувязі з эпідэмічнай абстаноўкай у сумежных краінах Рэспубліка Беларусь часова абмяжоўвае ўезд на сваю тэрыторыю праз наземныя пункты пропуску асобных катэгорый фiзiчных асобаў з Латвіі, Літвы, Польшчы і Украіны».

З паведамлення ДПК, пад абмежаванні не падпадаюць:

- супрацоўнікі дыпламатычных прадстаўніцтваў і консульскіх устаноў, дакументаваных дыпламатычнымі і службовымі пашпартамі;

- кіроўцы транспартных сродкаў, прызначаных для выканання міжнародных аўтамабільных перавозак;

- чальцы цягніковых і лакаматыўных брыгад міжнародных чыгуначных злучэнняў.

Пункт пропуску ў Нацыянальным аэрапорце Менск функцыянуе без абмежаванняў.