На мяжы з Расеяй заўважылі ракетны комплекс, якога няма ў войску Беларусі

• 1.11.2020, 10:25

Што зброя рабіла на тэрыторыі нашай краіны?

У Віцебскай вобласці, ля памежнага пераходу «Чырвоная горка» на мяжы з Расеяй заўважаныя вельмі цікавыя ракетныя комплексы. Чытачы tut.by знялі іх на відэа.

А 16 гадзіне 31 кастрычніка каля расейскай мяжы ў Дубровенскім раёне Віцебскай вобласці чытач заўважыў і зняў дзве даволі буйныя вайсковыя машыны. Вывучыўшы кадры роліка, мы зрабілі выснову, што гэта з велізарнай верагоднасцю берагавыя ракетныя комплексы «Бастыён» на шасі МЗКЦ-7930.

Калі шматлікія ўзоры вайсковай тэхнікі расейскай ці беларускай вытворчасці могуць стаяць на ўзбраенні войскаў як РФ, так і РБ, то з «Бастыёны» ўсё абсалютна адназначна. Колькі б у Сеціве не жартавалі пра «шосты флот ля берагоў Беларусі», у рэальнасці берагавым РК у нашай краіне, якая не мае выхаду да мора, рабіць абсалютна няма чаго - так што гэта, хутчэй за ўсё, расейская тэхніка.

Уласна, значная большасць пабудаваных «Бастыёнаў» стаіць на ўзбраенні таго ці іншага флоту Расеі (Балтыйскага, Чарнаморскага, Паўночнага або Ціхаакіянскага). Усяго некалькі ракетных комплексаў былі пастаўленыя на экспарт у краіны Азіі ці Лацінскай Амерыкі.

«Бастыён» - даволі сучасная тэхніка, на ўзбраенне ракетны комплекс пайшоў усяго 10 гадоў таму. Узбройваецца ён самай папулярнай у Расеі ўніверсальнай супрацькарабельнай ракетай «Онікс» (у экспартным варыянце - «Яхонт»). За адзін залп «Бастыён» можа адправіць суперніку да 24 ракет, тэарэтычна за раз ёсць магчымасць утапіць невялікую эскадру або канвой - на практыцы гэта ніколі не правяралася.

У баявую гатоўнасць комплекс прыводзіцца менш чым за пяць хвілін, адзін «Бастыён» перакрывае ўзбярэжжа працягласцю больш чым у 600 кіламетраў, больш сучаснай зброяй такога класа ў Расеі можна назваць, мабыць, толькі «Бал», які ў чэрвені паказалі на Парадзе Перамогі ў Маскве.

Што канкрэтна рабілі «Бастыёны» ў Беларусі, не вельмі зразумела. Верагодна, праходзілі якія-небудзь рамонтныя работы - усё ж машына выканана на шасі МЗКЦ, распрацаваным і сабраным беларускімі спецыялістамі.