Памёр захварэлы на COVID-19 вядомы беларускі банкір

• 12.11.2020, 14:32

Васіль Швед быў намеснікам кіраўніка ўправы Банка развіцця.

На 61-м годзе жыцця памёр намеснік старшыні ўправы Банка развіцця Васіль Швед. Гэтую інфармацыю tut.by пацвердзілі ў банку.

Прычына смерці – ускладненні, выкліканыя каранавіруснай інфекцыяй.

Васіль Швед нарадзіўся 10 чэрвеня 1960 года ў пасёлку Лынтупы Пастаўскага раёна Віцебскай вобласці. Скончыў Новасібірскую вышэйшую камандную ваенна-палітычную агульнавайсковую вучэльню, Ваенны ўніверсітэт, Беларускі дзяржаўны эканамічны ўніверсітэт.

Пасля заканчэння службы ва Узброеных сілах у 1995 годзе стаў асноўным экспертам службы рэжыму і бяспекі Акцыянернага камерцыйнага банка знешнеэканамічнай дзейнасці Беларусі. Потым працаваў у Нацбанку, Банку міжнароднага гандлю і інвестыцый, прыватнай кампаніі «Солпол». З 2005 да 2012 года быў намеснікам старшыні ўправы Белаграпрамбанка.

У лютым 2013 года адгукнуўся на прапанову Сяргея Румаса і стаў ягоным намеснікам у Банку развіцця. Курыраваў дзейнасць упраўленняў працы з персаналам і інфармацыйных тэхналогій, а таксама філіялаў банка.