Гіганты беларускай прамысловасці ўгразлі ў абавязках

• 14.11.2020, 21:40

Іх прыбытак за апошні год значна ўпаў.

Колькі зарабілі з пачатку года беларускія заводы? Пра гэта ў матэрыяле «Радыё Свабода».

БелАЗ

Са студзеня да верасня прамысловы гігант БелАЗ, паводле афіцыйнай справаздачы, запрацаваў 15,9 мільёна рублёў. Гэта ў 13 разоў менш, чым за такі ж перыяд летась. У завода 337 мільёнаў доўгатэрміновых крэдытаў і пазык. А летась было толькі 34 мільёны. За год абавязак вырас у 10 разоў.

МТЗ

15,5 мільёна рублёў са студзеня да верасня запрацаваў МТЗ, ці ўтрая менш, чым за такі ж перыяд летась. У завода 530 мільёнаў крэдытаў і пазык, за год абавязкі выраслі на 67 мільёнаў.

БМЗ

34 тысячы рублёў са студзеня да верасня запрацаваў Беларускі металургічны завод. Летась прыбытак за такі ж перыяд быў яшчэ меншы-17 тысяч рублёў. Завод павінен 1,1 мільярда рублёў паводле доўгатэрміновых крэдытаў і пазык. За год гэты паказчык вырас на 73 мільёны.

Гомсельмаш

Са студзеня да сакавіка вытворца камбайнаў спрацаваў са стратамі на 260 мільёнаў рублёў. Летась у такі ж перыяд страты былі на 13 мільёнаў. У гэтага прамысловага гіганта 1,2 мільярда крэдытаў і пазык. За год гэтая сума вырасла на 274 мільёны.

Менскі электратэхнічны завод імя Казлова

Са студзеня да верасня чысты прыбытак Менскага электратэхнічнага завода імя Казлова - 4,1 мільёна. Завод вінен па крэдытах і пазыках 4,2 мільёна. За год паменшыў запазычанасць на 2,5 мільёна.

Менскі інструментальны завод

Са студзеня да верасня Менскі інструментальны завод зарабіў 141 тысячу рублёў. У заводу 476 тысяч доўгатэрміновых пазык і крэдытаў. За год даўгі выраслі на 97 тысяч.

Што адбываецца з экспартам прадукцыі?

Экспарт машын, абсталявання і транспартных сродкаў з Беларусі за студзень-верасень у параўнанні з такім жа леташнім перыядам упаў на 14%, экспарт мінеральных прадуктаў - на 38%.

Экспарт чорных, каляровых металаў і вырабаў з іх знізіўся на 13,7%, экспарт хімічнай прамысловасці - на 6%, экспарт тэкстылю і вырабаў з яго ўпаў амаль на 20%.