Як гамельчукі пратэставалі ў нядзелю

• 2.11.2020, 11:05

«Муры», акцыя супрацоўнікаў БЧ і флэшмобы ў сваіх мікрараёнах.

Учора ў Беларусі зноў прайшлі мірныя акцыі, піша сайт «Сильные новости».

Удзень гамельчукі звярнулі ўвагу на вялікі збой міліцэйскіх машын на плошчы Леніна. Знайшлося месца і аўтазаку. У нядзелю людзі шпацыравалі невялікімі кампаніямі па Савецкай. Прыкладна а 15.30 у раёне скверу імя Грамыкі сабралася калона прыкладна з двух дзясяткаў чалавек: дзяўчаты пачалі спяваць «Муры», часам сігналілі аўтамабілі.

У раёнах прадоўжыліся флэшмобы. Так, напрыклад, жыхары Валатавы сталі ў ланцужок салідарнасці з бел-чырвона-белымі сцягамі.

Далучыліся да акцыі і жыхары Фестывальнага. Яны падтрымалі страйкоўцаў працоўных і студэнтаў. «Разам да перамогі! Гомель з вамі!» - заявілі яны.

Бліжэй да вечара на акцыю выйшлі супрацоўнікі Беларускай чыгункі. «Мы выказваем салідарнасць усім рабочым-страйкоўцам заводаў, а таксама работнікам іншых арганізацый, у тым ліку работнікам Беларускай чыгункі», - кажуць яны.