Беларускі суд адправіў сваю пастанову паводле справы журналісткі ў Чэхаславакію

• 4.11.2020, 10:49

Гэтая краіна не існуе ўжо 27 гадоў.

Суд Маскоўскага раёна Менска адправіў пастанову пра высылку з Беларусі журналісткі тэлеканала «Настоящее время » Ірыны Рамалійскай у Чэхаславакію, якой не існуе з 1993 года, піша «Медиазона».

Рамалійскай па пошце адправілі матывавальную частку пастановы суда ад 10 верасня аб парушэнні заканадаўства аб СМІ (частка 2 артыкула 22.9 КоАП). У дакуменце сказана, што Рамалійская «незаконна вырабіла прадукцыю СМІ», не маючы пры гэтым акрэдытацыі. Сама журналістка пацвердзіла, што прыехала ў Менск у службовую выправу, але акрэдытацыі ў яе не было. Паводле пастановы суда журналістка аштрафаваная на 50 базавых адзінак. Таксама паказана, што яшчэ 7 жніўня намеснік начальніка аддзела ў грамадзянстве і міграцыі Маскоўскага РУУС Менска прыняў пастанову аб высылцы Рамалійскай з Беларусі з забаронай на ўезд у краіну на працягу 10 гадоў.

Рамалійская адзначыла, што ў пастанове месцам затрымання пазначаная Кахоўская вуліца, 31, дзе знаходзіцца кінатэатр «Кіеў», але яе з калегамі затрымалі ў гатэлі. Журналістка мяркуе, што першапачаткова сілавікі планавалі затрымаць іх на дзень раней, калі здымачная група здымала сюжэт менавіта каля кінатэатра «Кіеў».