Прэзідэнта ЗША вызначыць нікчэмная розніца галасоў
- 4.11.2020, 16:13
Што трэба для перамогі Трампу і Байдэну.
Праз некалькі гадзін пасля закрыцця выбарчых участкаў на выбарах у ЗША іх пераможца ўсё яшчэ не названы: вынік прэзідэнцкай гонкі вызначыць малюсенькі разрыў у галасах, піша Reuters.
Паводле стану на сярэдзіну дня 4 лістапада (па Кіеву) дакладна невядомы зыход галасавання яшчэ ў шасці штатах, нагадвае агенцтва: гэта Джорджыя, Мічыган, Невада, Паўночная Караліна, Пенсільванія і Вісконсін.
Пры гэтым Джо Байдэну для перамогі трэба атрымаць перавагу як мінімум у трох з іх, а Дональду Трампу - прынамсі ў чатырох, піша «Новое время».
Да 14:00 паводле Менску Байдэн утрымліваў нязначную перавагу ў Невадзе і Вісконсіне, тады як Трамп меў такую ж невялікую перавагу ў Джорджыі, Паўночнай Караліне, Пенсільваніі і Мічыгане. Хоць у гэтых штатах яшчэ трэба падлічыць дзясяткі тысяч бюлетэняў, многія з якіх былі высланыя праз пошту выбарнікамі з раёнаў, прылеглых да буйных гарадоў, якія традыцыйна падтрымліваюць дэмакратаў.
«Зыход [галасавання] амаль напэўна вызначаць мільёны бюлетэняў для завочнага галасавання, якія на гэтых выбарах былі выкарыстаныя першымі, аднак падлічаць іх, хутчэй за ўсё, апошнімі», - адзначае Reuters.
Агенцтва апісвае два сцэнары, пры якіх перамога можа дастацца як Дональду Трампу, так і Джо Байдэну.
Як можа перамагчы Трамп
Найбольш магчымы шлях да перамогі для цяперашняга прэзідэнта ЗША ляжыць праз Пенсільванію - штат, які ён заваяваў у 2016 годзе. Калі ён пераможа там зноў, то яму застанецца перамагчы ўсяго ў трох іншых штатах [з тых шасці, дзе яшчэ невядомы вынік гонкі], каб атрымаць 270 галасоў выбарнікаў. Калі ж Трамп не пераможа ў Пенсільваніі, то яму давядзецца скарыць астатнія пяць.
Пасля падліку блізу 75% галасоў Трамп лідараваў у Пенсільваніі (блізу 55% супраць 43% у Байдэна).
Аднак найбуйнейшыя гарады штата, Філадэльфія і Пітсбург, пакуль перадалі толькі невялікую частку звестак аб выніках галасавання, а яго вынік звычайна складваецца на карысць дэмакратаў. Акрамя таго, многія бюлетэні, якія яшчэ трэба падлічыць, былі адпраўленыя праз пошту, і, паводле звестак штата, сёлета ў такім галасаванні ўзялі ўдзел значна больш дэмакратаў, чым рэспубліканцаў.
У Пенсільваніі ёсць яшчэ адна загваздка: мясцовыя суды пастанавілі, каб падлік бюлетэняў, высланых праз пошту да аўторка [вызначальнага дня галасавання], тут доўжыўся як мінімум да пятніцы - пакуль яны дойдуць праз пошту.
Як можа перамагчы Байдэн
Для Байдэна найбольш магчымы шлях да перамогі ляжыць праз Неваду і Вісконсін. Гэта штаты, дзе ўранку ў сераду ён утрымліваў невялікую перавагу, у той час як ішла праца над канчатковым падлікам галасоў. Калі Байдэн пераможа ў гэтых штатах, то для перамогі яму будзе дастаткова таксама перамагчы ў Джорджыі, Мічыгане або ў Пенсільваніі (у адным са штатаў - заўв. рэд), піша Reuters.
У Мічыгане Трамп лідараваў з 51% супраць 47% у Байдэна, аднак многія яшчэ не ўлічаныя галасы - гэта паштовае галасаванне ў Дэтройце і яго прыгарадах, дзе дэмакраты гістарычна атрымліваюць перавагу на выбарах.
Афіцыйныя прадстаўнікі выбарчых камісій у Невадзе, дзе Байдэн меў нікчэмную перавагу (49,3% супраць 48,7% у Трампа) пасля падліку 86% галасоў, заявілі, што прадоўжаць гэты працэс толькі раніцай у чацвер (паводле мясцовага часу).