У Кіеве пачалі тэставаць на каранавірус усіх пацыентаў з запаленнем лёгкіх

• 31.03.2020, 14:12

У самой Украіне пацвердзілася 549 выпадкаў заражэння новай інфекцыяй.

Агульная колькасць пацверджаных выпадкаў захворвання каранавіруснай інфекцыяй COVID-19 у Кіеве павялічылася да 107, за апошні дзень у горадзе было зарэгістравана пяць новых хворых, паведаміў мэр украінскай сталіцы Віталь Клічко, піша gordomua.com.

«Мы пачалі тэставаць усіх пацыентаў з дыягназам "запаленне лёгкіх". Таму што ў многіх выпадках ускладненнем перанесенага захворвання [COVID-19] з'яўляецца менавіта пашкоджанне лёгкіх», – паведаміў Клічко.

За мінулыя суткі каранавірус пацвердзіўся яшчэ ў пяці жыхароў Кіева – чатырох мужчынаў ва ўзросце ад 45 да 49 гадоў і адной жанчыны – медыцынскай супрацоўніцы, ёй 55 гадоў.

«Адзін пацыент знаходзіцца ў Аляксандраўскай лякарні, чатыры астатнія – дома на самалячэнні», – расказаў Клічко.

Такім чынам, агульная колькасць пацверджаных выпадкаў захворвання каранавіруснай інфекцыяй COVID-19 у Кіеве павялічылася да 107.

З пачатку эпідэміі ў Кіеве на каранавірус пратэставалі 1900 чалавек, 813 узораў ужо праверылі ў лабараторыі, астатнія яшчэ даследуюцца, паведаміў мэр горада.

Ва Украіне, паводле звестак Міністэрства аховы здароўя на раніцу 31 сакавіка, пацвердзілася 549 выпадкаў каранавіруснай хваробы COVID-19, 13 чалавек памерлі, восем – ачунялі.