У Італіі за дзень памерла 837 чалавек, гэта больш, чым напярэдадні

• 31.03.2020, 20:27

Краіна займае першае месца ў свеце па колькасці смяротных вынікаў.

За апошнія 24 гадзіны ў Італіі 837 чалавек памерлі ад каранавіруснай хваробы COVID-19, паведаміла агенцтва ANSA, спасылаючыся на звесткі дэпартамента грамадзянскай абароны краіны.

Напярэдадні паведамлялася пра 812 смяротных выпадкаў, нагадвае gordonua.com.

Агульная колькасць памерлых за час успышкі дасягнула 12 428.

Выяўлена 2107 новых выпадкаў заражэння (на 459 больш, чым учора). Улады тлумачаць рост гэтага паказчыка тым, што з 31 сакавіка ўдалося значна павялічыць колькасць тэстаў.

1109 чалавек за дзень выпісалася са шпіталяў (усяго - 15 729).

Прэзідэнт Вышэйшага інстытута здароўя Італіі Сільвіё Брусафера заявіў на брыфінгу ў Рыме, што краіна дасягнула піка эпідэміі. З яго слоў, пік - гэта не пункт, за якім рушыць услед спад захворвання, а «плато, з якога неабходна спусціцца».

Нягледзячы на тое, што з 11 сакавіка ў Італіі дзейнічаюць строгія карантынныя захады, краіна займае першае месца па колькасці памерлых (прыкладна траціна ўсіх ахвяраў пандэміі) і другое месца па колькасці заражаных пасля ЗША.

31 сакавіка ў Італіі аб'явілі хвіліну маўчання па загінулых, нацыянальныя сцягі на будынках муніцыпалітэтаў былі прыспушчаныя.

Паводле звестак амерыканскага Універсітэта Джонса Хопкінса на 31 сакавіка, агульная колькасць інфіцыраваных у свеце перавысіла 823 тысячы, з іх больш за 40 тысяч чалавек памерлі, больш за 174 тысячы ачунялі.