СААЗ заклікае дзяржавы прадоўжыць актыўную барацьбу з каранавірусам
- 31.03.2020, 21:56
Новыя скокі колькасці выпадкаў найбольш верагодныя ў бедных краінах.
Нягледзячы на значныя паляпшэнні ў такіх краінах, як Кітай і Паўднёвая Карэя, Сусветная арганізацыя аховы здароўя ў аўторак заявіла, што эпідэмія каранавіруса ў рэгіёне яшчэ далёкая ад завяршэння, паведамляе «Голос Америки».
«Гэта будзе доўгатэрміновая бітва, і нельга аслабіць пільнасць. Трэба, каб кожная краіна працягвала дзейнічаць у адпаведнасці са сваёй сітуацыяй», - заявіў рэгіянальны дырэктар СААЗ Такешы Касаі. Кітай у аўторак паведаміў пра адну смерць і 48 новых выпадкаў заражэння, ні адзін з якіх не звязаны з перадачай віруса ўнутры краіны, у той час як Паўднёвая Карэя зафіксавала 125 новых выпадкаў.
Са слоў Касаі, няма ніякіх указанняў на тое, што падвышэнне тэмператур замарудзіць распаўсюджванне віруса, як спадзяваліся некаторыя. Колькі будзе доўжыцца пандэмія, вызначыць пакуль немагчыма.
У СААЗ асцерагаюцца, што новыя скокі колькасці выпадкаў найбольш верагодныя ў самых бедных краінах. Першыя выпадкі заражэння каранавірусам у Лаосе і М'янме былі зафіксаваныя толькі на мінулым тыдні, і экспэрты мяркуюць, што шмат выпадкаў было выпушчана ў сувязі з недастатковым аб'ёмам тэставання.
Экспэрты настойваюць, што ўрадам неабходна прымаць актыўныя захады і працягваць ціск, каб стрымаць распаўсюджванне віруса. Сярод такіх захадаў: правядзенне аналізаў, ізаляцыя, адсочванне кантактаў і карантын.
Выканаўчы дырэктар праграмы СААЗ у надзвычайных сітуацыях у галіне аховы здароўя Майкл Раян выказвае надзею, што ў найбольш пацярпелых краінах, такіх як Італія і Гішпанія, сітуацыя неўзабаве пачне стабілізавацца.
Раян таксама адзначае недахоп ахоўных масак для медработнікаў і падкрэслівае, што СААЗ не рэкамендуе здароваму насельніцтву насіць маскі.
У ЗША эпіцэнтрам эпідэміі стаў Нью-Ёрк, дзе зафіксавана больш за 900 смерцяў. Губернатар штата Нью-Ёрк Эндру Куома звярнуўся з заклікам пра дапамогу да ўсёй краіны, папрасіўшы медработнікаў з рэгіёнаў, дзе сітуацыя не гэткая абвостраная, прыехаць у Нью-Ёрк.
Губернатар штата Каліфорнія Гэвін Ньюс заклікаў лекараў, якія выйшлі на пенсію, і студэнтаў медыцынскіх ВНУ, падлучыцца да барацьбы з эпідэміяй. У панядзелак ён паведаміў, што за апошнія чатыры дні колькасць пацыентаў, шпіталізаваных з каранавірусам, павялічылася амаль утрая.
Паводле звестак на раніцу аўторка, агульная колькасць выпадкаў заражэння ў ЗША перавысіла 164 000, а колькасць смерцяў - 3100.
Афрыканскія цэнтры кантролю і прадухілення захворванняў у аўторак паведамілі, што на кантыненце зафіксавана больш за 5000 выпадкаў, чвэрць з якіх прыпадае на Паўднёва-Афрыканскую Рэспубліку.
Шэраг краін у аўторак ўвялі новыя абмежавальныя захады: так, Інданезія забараніла ўезд усім замежным грамадзянам, Японія рэкамендавала сваім грамадзянам не ездзіць у краіны з абвостранай эпідэміялагічным становішчам, у тым ліку ў ЗША, Кітай і Паўднёвую Карэю. В'етнам плануе з серады абвясціць карантын на тэрыторыі ўсёй краіны.