У беларускім бюджэце ўтварыўся дэфіцыт

• 2.04.2020, 11:01

Пра гэта сведчаць лічбы за люты.

У лютым гэтага года выдаткі дзяржаўнага бюджэту Беларусі перавысілі яго даходы на 0,5 млрд рублёў, піша select.by.

Яшчэ большы дэфіцыт сфармаваўся ў бюджэце сектара дзяржаўнага кіравання, куды акрамя рэспубліканскага бюджэту ўваходзяць мясцовыя бюджэты, а таксама Фонд сацыяльнай абароны насельніцтва.

У лютым дэфіцыт склаў 0,9 млрд рублёў, у выніку чаго прафіцыт бюджэту за студзень-люты склаў 0,6 млрд рублёў.

Прафіцыт бюджэту Фонду сацыяльнай абароны насельніцтва за два месяцы склаў 0,1 млрд рублёў, як і за студзень.

Пры гэтым даходы бюджэту сектара дзяржаўнага кіравання за студзень-люты дасягнулі 8,4 млрд рублёў, а рэспубліканскага бюджэту - 3,5 млрд рублёў.

Адбыўся недабор даходаў ад замежнаэканамічнай дзейнасці, прычым вельмі істотны: іх велічыня ў студзені-лютым склала ўсяго 0,4 млрд рублёў, што склала 9,1% ад удакладненага гадавога плана.

У той жа час паступленні ПДВ дасягнулі 2,5 млрд рублёў - 20,6% ад плана. Падатак на прыбытак апынуўся адмоўным - мінус 14 млн рублёў. Як растлумачылі ў Міністэрстве фінансаў РБ, гэта выклікана вяртаннем названага падатку некаторым плацельшчыкам.

Паступлення ў Фонд сацыяльнай абароны насельніцтва за студзень-люты гэтага года склалі 2,8 млрд рублёў.

Запазычанасць у падатках і зборах у лютым знізілася да 154,1 млн рублёў са 174,2 млн рублёў па выніках студзеня.

У лютым значна выраслі выдаткі бюджэту сектара дзяржаўнага кіравання: да 4,1 млрд рублёў з 3,7 млрд рублёў у студзені. А выдаткі рэспубліканскага бюджэту павялічыліся да 1,6 млрд рублёў з 1,5 млрд рублёў у студзені.

На агульнадзяржаўную дзейнасць у лютым было накіравана 0,7 млрд рублёў (0,6 млрд рублёў у студзені), на фінансаванне нацыянальнай эканомікі - 0,4 млрд рублёў (0,3 млрд), на фінансаванне сацыяльнай сферы - 1, 4 млрд рублёў (1,2 млрд).

Выдаткі Фонду сацыяльнай абароны насельніцтва склалі 1,4 млрд рублёў супраць 1,3 млрд рублёў.