Каранавірус выявілі ў кіраўніка Міністэрства аховы здароўя Ізраіля і ягонай жонкі

• 2.04.2020, 11:05

У ізаляцыю павінны сысці шэф Масада і кіраўнік Рады нацыянальнай бяспекі краіны.

У 71-гадовага міністра аховы здароўя Ізраіля Якава Ліцмана выявілі каранавірусную інфекцыю. Пра гэта 2 красавіка паведамляе са спасылкай на Міністэрства аховы здароўя Haaretz.

Са звестак выдання, COVID-19 выяўлены таксама ў ягонай жонкі.

Ліцман і ягоная жонка "адчуваюць сябе добра", яны будуць знаходзіцца дома пад наглядам медыкаў. Міністр будзе працаваць выдалена.

У Міністэрстве аховы здароўя падкрэслілі, што прайсці хатні карантын павінны ўсе чыноўнікі, якія камунікавалі з Ліцманам за апошнія два тыдні.

Haaretz адзначае, што ў ізаляцыі павінны таксама апынуцца шэф Масада Ёсі Коэн і кіраўнік Рады нацыянальнай бяспекі Мэір Бэн Шабат.

Успышка каранавіруснай інфекцыі COVID-19 пачалася ў снежні 2019 года ў кітайскім Ухані. 11 сакавіка Сусветная арганізацыя здароўя абвясціла распаўсюджванне каранавіруса пандэміяй. На 2 красавіка каранавірус выяўлены на тэрыторыі 180 краін і рэгіёнаў.

Са звестак амерыканскага Універсітэта Джонса Гопкінса на раніцу 2 красавіка, агульная колькасць інфікаваных у свеце перавысіла 937 тысяч, з іх амаль 194 тысячы ачунялі, а больш за 47 тысяч чалавек памерлі.

У Ізраілі зафіксавана больш за 6 тысяч грамадзян з каранавірусам, з іх 241 вылечыўся, а 26 сканалі.